އޭޓީއެފް މޯލްޑިވްސް ޖޫނިއާ އޯޕަން 2024ގެ އިނާމް ދިނުމުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައިވެރިވެވަޑައިގަންނަވައިފި އެވެ. 

އޭޓީއެފް މޯލްޑިވްސް ޖޫނިއާ އޯޕަން 2024 އަކީ 16 އަހަރުން ދަށުގެ ކުޅުންތެރިންނަށް އަމާޒުކޮށް ބައިނަލްއަގްވާމީ ޓެނިސް ފެޑެރޭޝަންގެ އެހީތެރިކަމާއިއެކު ބޭއްވި މުބާރާތެކެވެ. މުބާރާތުގެ އިނާމް ދިނުމުގެ ރަސްމިއްޔާތުގައި އެކި އެކި އިވެންޓުތަކުން ޗެމްޕިއަންކަން ހޯދި ކުޅުންތެރިންނަށް ވަޒީރު ރާފިޢު ވަނީ އިނާމް ހަވާލްކޮށްދެއްވާފަ އެވެ. 

މި މުބާރާތުގެ 16 އަހަރުން ދަށުގެ އަންހެން ސިންގަލްސް ޗެމްޕިއަންކަން ހޯދީ ރާއްޖޭގެ އާރާ އާސާލް އާޒިމް އެވެ. އަރާ ވަނީ ނަޔާރާ އުސާމާ އަލީ އާއިއެކު އަންހެން ޑަބަލްސްގެ ޗެމްޕިއަންކަންވެސް ހޯދާފަ އެވެ. 

ދިވެހި ކުޅުންތެރިންގެ ތެރެއިން މި މުބާރާތުގައި އެންމެ ރަނގަޅު ކާމިޔާބީތައް ހޯދީ އާރާ އެވެ. އޭނާ ވަނީ އޭޓީއެފް މޯލްޑިވްސް ޖޫނިއާ އޯޕަން 2024ގެ އިތުރުން އޭޓީއެފް މޯލްޑިވްސް އޯޕަންގެވެސް އަންހެން ސިންގަލްސް ޗެމްޕިއަންކަން ހޯދާފަ އެވެ. 

ގާތް ގާތުގައި ކުރިއަށްދިޔަ ދެ މުބާރާތަށް ބަލާއިރު ކޮންމެ މުބާރާތެއްގައިވެސް ހަ ގައުމަކުން 30 އަށްވުރެ ގިނަ ކުޅުންތެރިން ވާދަކުރި އެވެ.