ގއ. ނިލަންދޫ އާއި ދާންދޫގައި ސަރުކާރުން ޤާއިމުކުރި ފެންވަރު ރަނގަޅު އައުޓްޑޯ ވޮލީ ކޯޓު ރަސްމީކޮށް މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަޙްލޫފް ހުޅުއްވައިދެއްވައިފިއެވެ.

މި 2 ކޯޓު މިނިސްޓަރ އަޙުމަދު މަޙްލޫފް ހުޅުއްވައިދެއްވީ ގއ.އަތޮޅުގެ ބައެއް ރަށްރަށް މިމަހުގެ 1 އިން 2 އަށް ކުރެއްވި ރަސްމީ ދަތުރުފުޅުގެ ތެރެއިންނެވެ.

މި ދަތުރުފުޅުގައި މިނިސްޓަރ ވަޑައިގެންނެވި ރަށްތަކަކީ، ގއ.ނިލަންދޫ، ގއ.ދާންދޫ އަދި ގއ.ވިލިނގިލީގެ އިތުރުން އެ އަތޮޅު މާމެންދޫއެވެ.

މި ވޮލީކޯޓުތައް ހުޅުވުމުގެ ގޮތުން މި 2 ރަށުގައިވެސް ވަނީ ޚާއްސަ ވޮލީ މެޗެއްވެސް ކުޅެފައެވެ. މި މެޗުތަކުގައި މިނިސްޓަރ އަޙުމަދު މަޙްލޫފް ވެސް ވަނީ ބައިވެރިވެވަޑައިގެންފައެވެ.

މި ދަތުރުފުޅުގައި މިނިސްޓަރުގެ އަރިހުގައި ޔޫތް މިނިސްޓްރީގެ ޑެޕިއުޓީ މިނިސްޓަރ އަޙުމަދު ފުޢާދުގެ އިތުރުން ގއ.ދާންދޫ ދާއިރާގެ ޢިއްޒަތްތެރި މެމްބަރ ޔަޢުޤޫބް ޢަބްދުﷲ ގެ އިތުުރުން ޔޫތް މިނިސްޓްރީގެ ސީނިއަރ އެގްޒެކްޓިވް ޑިރެކްޓަރ އިސްމާއިލް ރަޢޫފް ވެސް ބައިވެރިވެވަޑައިގެންނެވިއެވެ.

މިނިސްޓަރު މަޚްލޫފް ވިދާޅުވީ މިހާރު ޖުމުލަ 12 އައުޓް ޑޯ ވޮލީ ކޯޓުގެ މަސައްކަތް ނިންމާލެވިފައިވާ ކަމަށެވެ. މީގެ އިތުރުން މިހާރު ވެސް 38 ރަށުގެ ވޮލީ ކޯޓު ޤާއިމުކުރުމުގެ މަސައްކަތް ކުރިއަށްދާ ކަމަށް މިނިސްޓަރު ވިދާޅުވިއެވެ.

ރާއްޖޭގެ ރަށްތަކުގައި ފެންވަރު ރަނގަޅު އައުޓް ޑޯ ވޮލީ ކޯޓުތައް ޤާއިމުކުރުމަކީ ވެސް މި ސަރުކާރުގެ ވައުދެކެވެ. އެގޮތުން ގިނަ ރަށްރަށުގައި މަސައްކަތް ކުރަމުން އަންނައިރު، ފެންވަރު ރަނގަޅު އިންޑޯ ވޮލީ ކޯޓުތަކެއް ޤާއިމުކުރުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ.

މި ދަތުރުފުޅުގައި މިނިސްޓަރ ވަނީ ގއ.ދާންދޫގައި ޤާއިމްކުރި އައުޓްޑޯ ޖިމް ވެސް ރަސްމީކޮށް ހުޅުއްވައިދެއްވާފައެވެ. މި ޖިމަކީ އިންޑިއާގެ އެހީގައި ރާއްޖޭގެ އެކި ރަށްރަށުގައި ޤާއިމްކުރަމުން އަންނަ ޖިމް ތަކުގެ ތެރެއިން ޖިމެކެއެވެ.

ގއ.އަތޮޅުގެ ބައެއް ރަށްތަކަށް ކުރެއްވި މި ދަތުރުފުޅުގައި މިނިސްޓަރ ވަނީ މި 4 ރަށުގެ ކައުންސިލާއި ޒުވާނުންނާއި ބައްދަލުކުރައްވާފައެވެ. އަދި ކައުންސިލާއި ޒުވާނުންގެ ކަންބޮޑުވުންތައް އަޑުއައްސަވާ އެންމެ އަވަހަށް ހައްލުކޮށްދެވެން ހުރި ކަންކަން ހައްލުކޮށްދެއްވާނެ ކަމަށް ވިދާޅުވެފައެވެ.

މީގެ އިތުރުން މި ދަތުރުފުޅުގައި މިނިސްޓަރ ވަނީ މި ރަށްތަކުގައި ޔޫތް މިނިސްޓްރީން ކުރިޔަށްގެންދާ އެކިއެކި މަޝްރޫޢުތަކުގެ މަސައްކަތް ކުރިޔަށްދާގޮތް ބައްލަވާލައްވާފައެވެ.