ދިވެހިރާއްޖޭގައި މިއަހަރު ބާއްވާ 7 ވަނަ ބައިނަލްއަޤުވާމީ ކުޅިވަރު މުބާރާތް ކަމަށްވާ ލިނިންގ އިންޓަރނޭޝަނަލް ޗެލެންޖް ފެށުމުގެ ރަސްމިއްޔާތު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ޝަރަފުވެރިކޮށްދެއްވައިފިއެވެ.

މިމުބާރާތް ފެށުމުގެ ގޮތުން ބޭއްވި ރަސްމިއްޔާތު އޮތީ މިއަދު ހެނދުނު، މާލޭ ކުޅިވަރު އެކުވެނި، ބެޑްމިންޓަން އިންޑޯ ކޯޓުގައެވެ. މިމުބާރާތް ފެށުމުގެ ރަސްމިއްޔާތަށް ފަހުގައި ރައީސުލްޖުމްހޫރިއްޔާ ވަނީ މުބާރާތުގެ ބައެއް މެޗުތައް ބައްލަވާލައްވާފައެވެ.

މި އަހަރުގެ ބީ.ޑަބްލިއު.އެފް ކޮންޓިނެންޓަލް ސާކިޓުގައި ހިމެނޭ، މޯލްޑިވްސް އިންޓަނޭޝަނަލް ޗެލެންޖް 2022ގެ މެޗުތައް ކުރިޔަށްދާނީ، މި އޮކްޓޫބަރު މަހުގެ 18 އިން 23 ގެ ނިޔަލަށެވެ. މި މުބާރާތުގައި ދުނިޔޭގެ 25 ޤައުމަކުން 200 ގިނަ ކުޅުންތެރިން ބައިވެރިވެއެވެ. އޭގެ ތެރޭގައި ބެޑްމިންޓަންގައި ދުނިޔޭގެ ފެންވަރުގައި ފާހަގަކޮށްލެވޭ މޮޅެތި ކުޅުންތެރިންވެސް ހިމެނެއެވެ.

ބައިނަލްއަޤުވާމީ ކުޅިވަރު މުބާރާތްތައް ރާއްޖޭގައި ބޭއްވުމަކީ ރައީސުލްޖުމްހޫރިއްޔާ ވެވަޑައިގެންފައިވާ ރިޔާސީ ވަޢުދެކެއެވެ. އެގޮތުން ބެޑްމިންޓަން މުބާރާތަކީ މިއަހަރު ބާއްވާ 7 ވަނަ ބައިނަލްއަޤްވާމީ މުބާރާތެއެވެ. އަދި މިއަހަރު ނިމުުމުގެ ކުރިން ޖުމްލަ 10 މުބާރާތް ބާއްވާނެ ކަމަށް ޔޫތް މިނިސްޓަރ އަޙުމަދު މަޙްލޫފް ވަނީ މީގެ ކުރިން ވިދާޅުވެފައެވެ.