ދިރާގު "އީއޭއެފްސީ 24، މިނީ ސީރީސް" މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން، އަބްދުﷲ ރާފިޢު ރަސްމީކޮށް ހުޅުއްވާ ދެއްވައިފި އެވެ. 

500 އަށްވުރެ ގިނަ ގޭމަރުންނާއިއެކު ފެށި އީ ގޭމިން މިނީ ސީރީސް އަންނަ ހޮނިހިރު ދުވަހާ ހަމައަށް ކުރިއަށްދާނެ އެވެ. 

ދިރާގު ހެޑް އޮފީހުގައި ކުރިއަށްދިޔަ ހާއްސަ ރަސްމިއްޔާތުގައި ވާހަކަދައްކަވަމުން މިނިސްޓަރު ރާފިޢު ވަނީ ރާއްޖޭގެ ކުޅިވަރު ކުރިއެރުވުމަށް ދިރާގުން ކުރަމުން އަންނަ މަސައްކަތް ފާހަގަކުރައްވައި، އެކަމަށް ޝުކުރު އަދާކުރައްވާފަ އެވެ. މިގޮތުން ދިރާގު ރޯޑް ރޭސްގެ ނަމުގައި ފަށައިގެން ކުރިއަށްގެންދާ ކާމިޔާބު ހަރަކާތަކީވެސް ކުޅިވަރަށް ކޮށްދެއްވި ބޮޑު ހިދުމަތެއްގެ ގޮތުގައި މިނިސްޓަރު ސިފަކުރެއްވި އެވެ. 

މިނިސްޓަރު ރާފިޢު ވިދާޅުވީ އީ ސްޕޯޓްސް އަކީ ކުރިއަށްދިޔުމަށް ފަހި ފުރުސަތެއް އޮތް ދާއިރާއެއްކަމަށާއި، އެންމެ ފަހުން އޮތް ކޮމަންވެލްތު ގޭމްސްގައިވެސް ރާއްޖޭގެ ގޭމަރުން ވާދަކުރެއްވި ކަމަށެވެ. 

މީގެ އިތުރުން މި މުބާރާތަކީ ހުނަރުވެރި ގޭމަރުން ތަރައްޤީކޮށް، ޕްރޮފެޝަނަލް ކުޅިވަރެއްގެ ގޮތުގައި އީސްޕޯޓްސް ކުރިއެރުވުމަށް އެހީވެދޭނެ މުބާރާތެއްގެ ގޮތުގައި މިނިސްޓަރު ސިފަކުރެއްވި އެވެ.