17 ރަށެއްގައި ކުޅިވަރު ވަސީލަތްތައް ޤާއިމްކުރުމަށް މި މިނިސްޓްރީން ކޮންޓްރެކްޓަރުންނާއެކު ސައިކޮށްފިއެވެ.

އެގޮތުން 8 ރަށެއްގައި އައުޓްޑޯރ ވޮލީކޯޓު ތަރައްޤީކުރުމަށް ބަޔަކާއި ހަވާލުކުރެވިފައިވާއިރު، 6 ރަށެއްގެ ފުޓްބޯޅަ ދަނޑަށް ބޭނުންވާ ޓާފް ސައިޕްލައިކޮށް އިންސްޓޯލްކުރުމުގެ މަސައްކަތް ކުރުމަށް ވަނީ ހަވާލުކުރެވިފައެވެ. އަދި 4 ރަށެއްގެ ފުޓްބޯޅަ ދަނޑުގެ ސަބްބޭސް މަސައްކަތް ކުރުމަށް ހަވާލުކުރެވިފައިވާއިރު، ހދ.ވައިކަރަދޫގައި ޔޫތް އެންޑް ކޮމިއުނިޓީ ސެންޓަރެއް ގާއިމްކުރުމަށް ބަޔަކާއި ވަނީ ހަވާލުކޮށްފައެވެ.

އެގޮތުން ހދ.ކުރިނބީ އަދި ބ.ދަރަވަންދޫގެ އިތުރުން ޅ.ކުރެންދޫގައި އައުޓްޑޯރ ވޮލީކޯޓު ތަރައްޤީކުރުމަށް ހަވާލުކުރެވިފައިވަނީ، ޓްރިޕަލް އެއިޓް ކުންފުންޏަށެވެ. އަދި ހއ.ހޯރަފުށި، ހދ.ވައިކަރަދޫ، ނ.މާފަރު އަދި ބ.ކިހާދޫގެ އިތުރުން އއ.ހިމަންދޫ ގައި ވޮލީކޯޓު ތަރައްޤީކުރުމަށް ހަވާލުކުރެވިފައިވަނީ ބްރިލިއަންޓް ކޮމްޕެނީ އަށެވެ.

6 ރަށެއްގެ ފުޓްބޯޅަ ދަނޑަށް ބޭނުންވާ ޓާފް ސައިޕްލައިކޮށް އިންސްޓޯލްކުރުމުގެ މަސައްކަތުގެ ދަށުން ހދ. ނޭކުރެންދޫ އާއި މ.މުލަކުގެ ފުޓްބޯޅަ ދަނޑުގައި ޓާފް އެޅުމަށް ހަވާލުކޮށްފައިވަނީ އަމީން ކޮންސްޓްރަކްޝަން އާއެވެ. އަދި އއ.ފެރިދޫ، ށ.ފޭދޫ އަދި ނ.ޅޮހީގެ އިތުރުން ނ. ލަންދޫގެ ފުޓްބޯޅަ ދަނޑުގައި ޓާފް އެޅުމަށް ހަވާލުކުރެވިފައިވަނީ، ކޯލައިން މޯލްޑިވްސް ޕްރައިވެޓް ލިމިޓެޑާއެވެ.

4 ރަށެއްގައި ތަރައްޤީކުރުމަށް ހަމަޖެހިފައިވާ ފުޓްބޯޅަ ދަނޑުތަކުގެ ސަބްބޭސް މަސައްކަތުގެ ދަށުން ށ.ފޭދޫ ދަނޑުގެ ސަބްބޭސް މަސައްކަތް ހަވާލުކޮށްފައިވަނީ ޓީއޭ ކޮންސްޓްރަކްޝަން އެންޑް ޓްރޭޑިންގ އާއެވެ. އަދި އއ.ފެރިދޫ ދަނޑުގެ ސަބްބޭސް މަސައްކަތް އެލިއޮތު އިންވެސްޓްމަންޓާއި ހަވާލުކުރެވުނުއިރު، އއ.އުކުޅަހު ފުޓްބޯޅަ ދަނޑުގެ ސަބްބޭސް މަސައްކަތް ހަވާލުކުރީ ސީއެމްއޭ ފައިވްސްޓަރ އާއެވެ. މީގެ އިތުރުން ހދ.ނާވައިދޫ ދަނޑުގެ ސަބްބޭސް މަސައްކަތް ހަވާލުކޮށްފައިވަނީ އާރުޖީ އިންޓަރނޭޝަނަލް އާއެވެ.

އަދި ހދ.ވައިކަރަދޫގައި ޔޫތް އެންޑް ކޮމިއުނިޓީ ސެންޓަރެއް ގާއިމްކުރުމަށް އާރު ޖީ އިންޓަރނޭޝަނަލް އާއެކު ވަނީ ސޮއިކުރެވިފައެވެ.