ރާއްޖޭގެ ހުރިހާ ރަށެއްގައި ތިބި ސްޕޯޓްސް ކައުންސިލަރުންނާއި، ޔޫތު އެސޯސިއޭޓުންނަށް އަމާޒުކޮށްގެން ކުރިއަށްގެންދާ "ހަށިހެޔޮ ރާއްޖެ" - ލީޑަރުން ތަމްރީންކުރުމުގެ ޕްރޮގްރާމް ޒޯން ފަހެއްގައި  ނިންމާލައިފި އެވެ.

ހަށިހެޔޮ މުޖުތަމަޢެއް ބިނާކުުރުމުގެ މަޤްޞަދުގައި ކުރިއަށްގެންދާ "ހަށިހެޔޮ ރާއްޖެ" ޕްރޮގްރާމުގެ ދަށުން ޒޯން ފަހެއްގެ ތަމްރީންތައް ކުރިއަށްގެންދިޔައީ ޑިސެމްބަރު 16 އިން 19 އަށެވެ. މި ޒޯންގައި ހިމެނެނީ ތ އަތޮޅާއި ލ އަތޮޅު ރަށްތަކެވެ. މި ދެ އަތޮޅުގެ ރަށްތަކުގެ ސްޕޯޓްސް ކައުސިލަރުންނާއި ޔޫތު އެސޯސިއޭޓުންގެ ތަމްރީންތައް ކުރިއަށްގެންދިޔައީ ލ. ފޮނަދޫގަ އެވެ. 

ރާއްޖޭގައި ހަ ޒޯނެއްގައި ލީޑަރުން ތަމްރީންކުރުމުގެ ޕްރޮގްރާމް މިހާތަނަށް ޒޯން އެކެއް، ޒޯން ދޭއް، ޒޯން ތިނެއް އަދި ޒޯން ހަތަރެއްގައި ވަނީ ހިންގާފަ އެވެ. އަދި ފަހު ޒޯން ކަމަށްވާ ޒޯން ހަޔެއްގައި މި ޕްރޮގްރާމް ކުރިއަށްދާނީ މިމަހުގެ 22 އިން 26 އަށެވެ.

ރަށް ރަށުގައި ތިއްބަވާ ސްޕޯޓްސް ކައުންސިލަރުންނާއި، ޔޫތު އެސޯސިއޭޓުން ތަމްރީންކުރުމުގެ ޕްރޮގްރާމްގެ ސަބަބުން ރަށް ރަށުގައި ކުޅިވަރު ވުޒާރާގެ ހަރަކާތްތައް ހަލުވިކަމާއިއެކު ކުރިއަށްގެންދިޔުމުގައި ގިނަ ފަސޭހަތަކެއްވާނެ އެވެ. މިގޮތުން ރައްޔިތުންނާ ގާތުން ކުޅިވަރު ވުޒާރާގެ މަސައްކަތްތައް ކުރިއަށްގެންދިޔުމުގައި މި ތަމްރީން ޕްރޮގްރާމްގެ ބައިވެރިން ހަރަކަތްތެރިވާނެ އެވެ.