ނަވާރަ އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތް ފެށުމުގެ ރަސްމިއްޔާތު މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިޢު ޝަރަފްވެރިކޮށްދެއްވައިފިއެވެ.

މި މުބާރާތް ކުރިޔަށްދާނީ ޖޫން މަހުގެ 9 އިން ޖުލައި 1 ގެ ނިޔަލަށެވެ.

މުބާރާތް ހުޅުވުމުގެ ރަސްމިިއްޔާތުގައި މިނިސްޓަރ ޢަބްދުﷲ ރާފިޢު އަރިހުގައި ސްޕޯޓްސް މިނިސްޓްރީގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ އިތުރުން ސްޕޯޓްސް މިނިސްޓްރީގެ އިސްވެރިންވަނީ ބައިވެރިވެވަޑައިގެންފައެވެ.

ގަލޮޅު ރަސްމީ ފުޓްބޯޅަ ދަނޑުގައި ކުރިއަށްދާ ޔޫތު ޗެމްޕިއަންޝިޕް ފުޓްބޯޅަ މުބާރާތުގައި 8 ޓީމެއް ވާދަކުރެއެވެ. އެއީ ޓީސީ ސްޕޯޓްސް ކްލަބް، އޮޑި ސްޕޯޓްސް ކްލަބް، ބުރު ސްޕޯޓްސް ކްލަބް، ސުޕަރ ޔުނައިޓެޑް ސްޕޯޓްސް، މާޒިޔާ، ކްލަބް ގްރީން ސްޓްރީޓްސް އަދި ކްލަބް އީގަލްސްގެ އިތުރުން ޔުނައިޓެޑް ވިކްޓްރީއެވެ.