މޯލްޑިވްސް ޗެސް އެސޯސިއޭޝަނުން އިންތިޒާމްކޮށްގެން ކުރިޔަށްގެންދިޔަ "ވެސްޓާން އޭޝިއަން ޗެސް ފެސްޓިވަލް 2022" ނިންމުމުގެ ރަސްމީޔާތު މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފް ޝަރަފްވެރިކޮށްދެއްވައިފިއެވެ.

ރާއްޖޭގައި މިހާތަނަށް ފުރަތަމަ ފަހަރަށް ބޭއްވި ބައިނަލްއަގްވާމީ ޗެސް މުބާރާތް ކުރިޔަށް ގެންގޮސްފައި ވަނީ ޖޫން 15 އިން ޖޫން 22 ގެ ނިޔަލަށް އއ.އުކުޅަހުގެ ކޮންވެންޝަން ސެންޓަރުގައެވެ.

މި މުބާރާތުގައި 9 ގައުމަކުން 180 ކުދިން ވަނީ ބައިވެރިވެފައެވެ. އަންހެން އަދި ފިރިހެން ޑިވިޝަން ހިމެނޭ ގޮތަށް މި މުބާރާތް ކުރިޔަށް ގެންގޮސްފައިވަނީ 6 އުމުރުފުރާއަކަށް ބަހާލައިގެންނެވެ.

އއ.އުކުޅަސް ކޮންވެންޝަން ސެންޓަރުގައި ރޭ ކުރިޔަށް ގެންދިޔަ މުބާރާތް ނިންމުމުގެ ރަސްމީޔާތުގައި ވަނީ ވަނަވަނައަށް ދިޔަ ކުދިންނަށް ވަނީ މެޑަލް އަދި ޓްރޮފީގެ އިތުރުން ހަނދާނީ ލިޔުން ދީފައެވެ.

ރާއްޖޭގެ އިތުރުން މި މުބާރާތުގައި ވާދަކުރީ ކަޒަކިސްތާން، ކިރިގިސްތާން، އުޒްބަކިސްތާން، ބަންގްލަދޭޝް، އިންޑިއާ، ނޭޕާލް، ޕާކިސްތާން އަދި ސްރީލަންކާއެވެ.