ބޮޑީބޯޑިން ވަރލްޑް ޓުއާގެ މުބާރާތެއް ކަމަށްވާ "ވިޒިޓް މޯލްޑިވްސް ޕްރޯ 2022" މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފް ލޯންޗުކޮށްދެއްވައިފިއެވެ.

މިނިސްޓަރ މަހުލޫފް މި މުބާރާތް ލޯންޗުކޮށްދެއްވީ އެކަމަށްޓަކައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންގައި ބޭއްވި ރަސްމީޔާތެއްގައެވެ. މި ރަސްމީޔާތުގައި މޯލްޑިވްސް ބޮޑީބޯޑިން އެސޯސިއޭޝަންގެ ރައީސް ޢަބްދުﷲ އަރީފް އާއި ޖެނެރަލް ސެކްރެޓަރީ ހަސަން ރަޝީދު ބައިވެރިވެވަޑައިގަތެވެ.

އަންނަ ޖުލައި މަހުގެ 29 އިން އޮގަސްޓް މަހުގެ 7 ވަނަ ދުވަހުގެ ނިޔަލަށް ކުރިޔަށްގެންދިޔުމަށް ހަމަޖެހިފައިވާ މި މުބާރާތް ކުރިޔަށްދާނީ މާލޭ ރާޅުގަނޑު ސަރަހައްދުގައެވެ.

ދުނިޔޭގެ ޗެމްޕިއަން ބޮޑީބޯޑަރުން ވާދަކުރާ މި މުބާރާތުގައި އެކި ގައުމުތަކުން 150 އެއްހާ އެތުލީޓުން ވާދަކުރާނެއެވެ. ހަތަރު ކެޓަގަރީއަކުން ބައިވެރިވާ ވާދަކުރާ މި އިވެންޓަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ.

މި ރަސްމީޔާތުގައި ވާހަކަ ދައްކަވަމުން މިނިސްޓަރ މަހުލޫފް ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ވައުދުތަކުގެ ތެރޭގައި ހިމެނޭ މޫދު ކުޅިވަރުގެ ބައިނަލްއަގްވާމީ މުބާރާތްތައް ރާއްޖެއަށް ގެނައުމުގެ ވައުދު ފުރިހަމަކުރެވޭތީ އުފާކުރައްވާކަމަށެވެ. އަދި މި މުބާރާތަކީ އެ މަސައްކަތުގެ ތެރެއިން ކުރެވޭ މަސައްކަތެއް ކަމަށްވެސް މިނިސްޓަރ ވިދާޅުވިއެވެ.