ރައްޔިތުންގެ މަޖިލީހުގެ ވިލިނގިލީ ދާއިރާގެ މެންބަރު ޢާޒިމް ޢަބްދުލްޢަޒީޒްއާ ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ބައްދަލުކުރައްވައިފި އެވެ.

ކުޅިވަރާ ބެހޭ ވުޒާރާގައި އޮތް ބައްދަލުވުމުގައި ވިލިނގިލީ ދާއިރާގެ ކުޅިވަރުގެ ހާލަތާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކުރެވިފަ އެވެ.

މެންބަރު އަޒީޒް ވަނީ އެ ރަށުގެ ރައްޔިތުންނަށް އެންމެ ބޮޑަށް ބޭނުންވާ ކުޅިވަރު ވަސީލަތްތަކާ ގުޅޭ މައުލޫމާތު ހިއްސާކުރައްވާފަ އެވެ. މިގޮތުން އަތޮޅުގެ އެންމެ އާބާދީ ބޮޑު ރަށުގައި އެކަށީގެންވާ ކުޅިވަރު ވަސީލަތްތައް ނެތްކަން މެންބަރު ހާމަކުރެއްވި އެވެ.

މެންބަރު އާޒިމް ވަނީ އަންނަ އަހަރުގެ ބަޖެޓުގައި ހިމަނައިގެން ކުރިއަށްގެންދަން ހަމަޖެހިފައިވާ މަޝްރޫޢުތަކުގެ ތަފްސީލްތައް އޮޅުންފިލުއްވާފަ އެވެ.

މި ބައްދަލުވުމުގައި ވަޒީރު ރާފިޢު ވަނީ ރަށްތަކަށް މިދިޔަ އަހަރުތަކުގައި ކުޅިވަރުގެ ދާއިރާއިން ހައްލުނުލިބި ހުރި މައްސަލަތައް ހައްލުކުރުމާ ގުޅޭގޮތުން މަޝްވަރާކުރައްވާފަ އެވެ. އަދި ކުރިއަށް އޮތް ދުވަސްތަކުގައި ގއ. ވިލިނގިލީ ކައުންސިލާ ގުޅިގެން އެ މައްސަލަތައް ހައްލުކުރައްވާނެކަމަށްވެސް ވިދާޅުވި އެވެ.