ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ރ. ރަސްމާދޫ ކައުންސިލާ ބައްދަލުކުރައްވައިފި އެވެ.

ރ. ރަސްމާދޫ ކައުންސިލާއެކު އޮތް ބައްދަލުވުން މިއަދު ކުރިއަށްދިޔައީ ކުޅިވަރާ ބެހޭ ވުޒާރައިގަ އެވެ.

މި ބައްދަލުވުމުގައި ރަސްމާދޫ ކައުންސިލުން ވަނީ އެ ރަށުގެ ރައްޔިތުން މިވަގުތު ބޭނުންވާ ކުޅިވަރު ވަސީލަތްތަކާ ގުޅޭ މައުލޫމާތު ވަޒީރާ ހިއްސާކުރައްވާފަ އެވެ. މިގޮތުން އެ ރަށުގެ އަންހެނުންނާއި، ފިރިހެނުން ވަކިން ހާއްސަކޮށް ޒުވާނުންގެ މެދުގައި މަގުބޫލު ކުޅިވަރުތަކުގެ ވަސީލަތްތައް ރަށުގައި ޤާއިމްކުރުމުގެ މުހިންމުކަން ކައުންސިލުން ފާހަގަކުރެއްވި އެވެ.

ވަޒީރު ރާފިޢު ވަނީ މި އަހަރު އެ ރަށުގައި ފެށުމަށް ހަމަޖެހިފައިވާ މަޝްރޫޢުތަކުގެ މައުލޫމާތު ކައުންސިލާ ހިއްސާކުރައްވާފަ އެވެ. އަދި މީގެ އިތުރުން އަންނަ އަހަރުގެ ބަޖެޓުގައި ހިމަނައިގެން އެރަށުގައި ކުރިއަށްގެންދަން ބޭނުންވާ ކަންކަމާ ގުޅޭގޮތުންވެސް މި ބައްދަލުވުމުގައި ވަޒީރު ރާފިޢު ވަނީ މަޝްވަރާކުރައްވާފަ އެވެ.

ރ. ރަސްމާދޫ އަކީ ގައުމީ ފެންވަރުގެ ރާޅާ އެޅުންތެރިން ނިސްބަތްވާ ރަށެކެވެ. އެ ރަށުގައި ސަގާފީ ކުޅިވަރުތަކަށްވެސް ބޮޑު ތަރުހީބެއް އޮންނަކަން ފާހަގަކޮށްލެވެ އެވެ.