މޯލްޑިވްސް ކަސްޓަމްސް ސާވިސްގެ އިސްވެރިންނާ، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައްދަލުކުރައްވައިފި އެވެ.

ކުޅިވަރު ވުޒާރާގައި ކުރިއަށްދިޔަ މި ބައްދަލުވުމުގައި ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ އާއި ޑެޕިއުޓީ ކޮމިޝަނަރ ޢަބްދުﷲ ވަހީދު، ޑެޕިއުޓީ ކޮމިޝަނަރ މަހުމޫދު ރިޔާޒް އަދި ޑެޕިއުޓީ ކޮމިޝަނަރ އިބްރާހިމް މަފާޒް ބައިވެރިވެވަޑައިގެންނެވި އެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ކަސްޓަމްސްގެ މުވައްޒަފުންނަކީ ދުޅަހެޔޮ ބަޔަކަށް ހެދުމަށް ކުރެވިދާނެ ކަންތައްތަކާ ގުޅޭގޮތުންނެވެ. މިގޮތުން ކުޅިވަރު ވުޒާރާއިން އިސް ނަގައިގެން ސަރުކާރު ކުންފުނިތަކާއި ސަރުކާރު އޮފީސްތަކުގެ މުވައްޒަފުންގެ ދުޅަހެޔޮކަމަށް ކުރިއަގެންދަން ނިންމާފައިވާ ހަރަކާތްތައް ވަނީ ކަސްޓަމްސްގެ އިސްވެރިންނާ ހިއްސާކުރެވިފަ އެވެ.

ކަސްޓަމްސް އަކީ ޒަމާނުއްސުރެ ދިވެހި ކުޅިވަރަށް ގިނަ ހިދުމަތްތަކެއް ކުރަމުން އަންނަ މުވައްސަސާއަކަށްވެފައި، އެ އޮފީހުގެ ރެކްރިއޭޝަން ކުލަބާ ގުޅިގެން ހިންގިދާނެ ކުޅިވަރު ޕްރޮގްރާމްތަކާ ގުޅޭގޮތުންވެސް މި ބައްދަލުވުމުގައި މަޝްވަރާ ކުރެވުނެވެ.