ރާއްޖެއިން ތައިލެންޑަށް ކަނޑައަޅުއްވާފައިވާ ސަފީރު ފުއާދު ތަޢުފީގު އާ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައްދަލުކުރައްވައިފި އެވެ. 

ކުޅިވަރާއި ހަށިހެޔޮކަމާ ބެހޭ ވުޒާރާގައި ކުރިއަށްދިޔަ މި ބައްދަލުވަކީ ދިވެހިރާއްޖެއިން ތައިލެންޑަށް ކަނޑައެޅުއްވި އާ ސަފީރު ފުއާދު ތަޢުފީގު ތައިލެންޑަށް ފުރާވަޑައިގަތުމުގެ ކުރިން ކަމާ ގުޅުންހުރި ދާއިރާތަކުން ހިޔާލު ބަދަލުކުރުމަށް ކުރިއަށްގެންދެވި ބައްދަލުކުރެއްވުމެކެވެ. 

 މި ބައްދަލުކުރެއްވުމުގައި ސަފީރު ވަނީ ކުޅިވަރާ ގުޅުން ހުރި ދާއިރާތަކުން އެހީތެރިވެވޭނެ ގޮތްތަކާއި ގުޅޭގޮތުން ވަޒީރު ރާފިޢުއާ މަޝްވަރާކުރައްވާފަ އެވެ. މިގޮތުން ދިވެހިރާއްޖޭގެ ކުޅިވަރު ކުރިއެރުވުމަށް ތައިލެންޑުން އެހީތެރިކަން ހޯއްދަވައިދެއްވުމަށް މަސައްކަތްކުރައްވާނެކަމަށް ސަފީރު ވިދާޅުވި އެވެ.

އަދި ސަފީރުގެ އެހީގައި ތައިލެންޑާއި ގުޅިގެން ރާއްޖޭގެ ކުޅިވަރު ކުރިއެރުވުމަށް ކުރެވޭނެ ކަންކަމާ ގުޅޭގޮތުންވެސް މި ބައްދަލުވުމުގައި ވަނީ މަޝްވަރާކުރެވިފަ އެވެ.