ޓެކާސް ރިސޯޓް ކަޕް 2024 ފެށުމުގެ ގޮތުން ކުރިއަށްގެންދިޔަ ހާއްސަ ޗެރިޓީ މެޗުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ކުޅުއްވައިފި އެވެ.

ކްރޮސްރޯޑްސްގައި ކުރިއަށްދާ ޓެކާސް ރިސޯޓް ކަޕް 2024 ހުޅުވުމުގެ ގޮތުން ކުޅުނު ޗެރިޓީ މެޗުގައި ވާދަކުރީ ކުޅިވަރާއި ހަށިހެޔޮކަމާ ބެހޭ ވުޒާރާގެ ޓީމަކާއި، ފަތުރުވެރިކަމުގެ ދާއިރާއާ ގުޅުންހުރި އެކި އެކި ފަރާތްތައް ހިމެނޭ ޓީމެކެވެ.

ކުޅިވަރު ވުޒާރާގެ ޓީމްގައި މިނިސްޓަރ ރާފިޢުގެ އިތުރުން ދެ ސްޓޭޓް މިނިސްޓަރުންނާއި، އެ ވުޒާރާގެ ބައެއް މުވައްޒަފުން ކުޅުނެވެ. ފަތުރުވެރިކަމުގެ ދާއިރާގެ ޓީމުގައި މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ އެމްޑީ އިބްރާހިމް ޝިއުރީގެ އިތުރުން ޑެޕިއުޓީ ކޮންޓްރޯލާ އޮފް އިމިގްރޭޝަން އަހުމަދު އަޝްފާން ކުޅުއްވި އެވެ. މީގެ އިތުރުން ދެ ޓީމްގައިވެސް ރާއްޖޭގެ ފުޓްބޯޅައިގެ ކުރީގެ ތަރިން ކުޅުނެވެ.

ފޯރިގަދަ އަދި ވާދަވެރިކޮށްދިޔަ މި މެޗު 5-3ގެ ނަތީޖާއަކުން ކާމިޔާބުކުރީ ކުޅިވަރު ވުޒާރާގެ ޓީމެވެ.

މި މެޗަށްފަހު ރިސޯޓް ފުޓްސަލް ކަޕް 2024ގެ މާލޭ ޒޯންގެ މެޗުތައް ވަނީ ފަށާފަ އެވެ.