ސްރީލަންކާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ރަންގަ ގޫނަވަރްދެނާއާ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައްދަލުކުރައްވައިފި އެވެ.

ކުޅިވަރު ވުޒާރާގައި އޮތް މި ބައްދަލުވުމުގައި މިނިސްޓަރ ރާފިޢު ވަނީ މިވަގުތު ރާއްޖެެގެ ކުޅިވަރުގެ ހާލަތު ސްރީލަންކާ ސަފީރާ ހިއްސާކުރައްވާފަ އެވެ.

މީގެ އިތުރުން ސަރުކާރުން ކުޅިވަރު ކުރިއެރުވުމަށް ގެންގުޅުއްވާ ތަސައްވުރާއި، ކުރިއަށް ހުރި ކަންތައްތައް ހިއްސާކުރެއްވި އެވެ. އަދި މިހާތަނަށް ސްރީލަންކާ އިން ރާއްޖޭގެ ކުޅިވަރު ކުރިއެރުވުމަށް ކޮށްދެއްވާފައިވާ ކަންކަން މިނިސްޓަރ ފާހަގަކުރެއްވި އެވެ.

މި ބައްދަލުވުމުގައި ސްރީލަންކާގެ ސަފީރު ވަނީ ރާއްޖޭގެ ކުޅިވަރު ކުރިއެރުވުމަށް އެގައުމުން ވެވެން އޮތް ހުރިހާ އެހީއެއް ވެދެއްވާނެކަމުގެ ޔަގީންކަން މިނިސްޓަރ ރާފިޢުއަށް އަރުވާފަ އެވެ.