ސިވިލް ސޮސައިޓީ އެވޯޑް 10 ޖަމްޢިއްޔާއަކަށް ލިބިއްޖެއެވެ.

ބުރާސްފަތި ދުވަހުގެ ރޭ ޒުވާނުންގެ މަރުކަޒުގައި ބޭއްވި ސިވިލް ސޮސައިޓީ އެވޯޑް ހަފްލާގައި ޖަމްޢިއްޔާތަކަށް އެވޯޑްތައް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއެވެ.

މި އެވޯޑް ހަފްލާގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު އަދި ރައީސުލްޖުމްހޫރިއްޔާގެ ނައިބު ފައިސަލް ނަސީމްގެ އިތުުރުން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަޚްލޫފް އަދި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫންގެ އިތުރުން ދަޢުލަތުގެ އިސްވެރިން ވަނީ ބައިވެރިވެވަޑައިގެންފައެވެ.

ސިވިލް ސޮސައިޓީ އެވޯޑަކީ، އިޖުތިމާއީގޮތުން ބާރުވެރިކުރުވުމަށް އަމިއްލައަށް އިސްނަގައިގެން، ޖަމިއްޔާތައް ނިސްބަތްވާ މުޖުތަމައުގެ ރައްޔިތުންގެ ދިރިއުޅުމުގެ ހާލަތު ރަނގަޅުކުރުމަށް ތަފާތު ގޮތްގޮތުން ހިލޭ ސާބަހަށް މަސައްކަތްކުރުމުގައި މަދަނީ ޖަމިއްޔާތަކުގެ ތެރެއިން ނަމޫނާ ދައްކުވައިދޭފަދަ މަސައްކަތްތައް ކޮށްފައިވާ ޖަމްޢިއްޔާތަކަށް ޤައުމީ ފެންވަރުގައި މި އަހަރު ދޭން ފެށި އެވޯޑެކެއެވެ.

އެވޯޑްތައް ލިބުނު ޖަމިއްޔާތަކާއި ދާއިރާތައް:

އަންހެނުންނާއި ކުޑަކުދިންނާއި ޒުވާނުންގެ ހައްގުތައް ހިމާޔަތްކޮށް، އެ ފަރާތްތައް ބާރުވެރިކުރުވުމުގެ އެވޯޑް: ސަދަން ކޮމިއުނިޓީ އެމްޕަވަރމަންޓް އެސޯސިއޭޝަން އޮފް މޯލްޑިވްސް

ހާއްސަ އެހީގެ ދާއިރާ އެވޯޑް: ކެއަރ ސޮސައިޓީ

ތައުލީމީ ދާއިރާ އެވޯޑް: އިހަވަންދޫ މަސްވެރިންގެ ގުޅުން

ދިވެހި ސަގާފަތާއި އާދަކާދަތަކާއި ތާރީހީ ތަރިކަ އަދި ދިވެހި ބަސް ދިރުވުމުގެ އެވޯޑް: ދިވެހިރާއްޖޭގެ އަދަބީ ޅެންވެރިންގެ ޖަމިއްޔާ

ތިމާވެށީގެ ދާއިރާ އެވޯޑް: ނައިފަރު ޖުވެނައިލް

ސިއްހީ ދާއިރާ އަދި ދުޅަހެޔޮ މުޖުތަމައަކަށް މަސައްކަތް ކުރުމުގެ އެވޯޑް: އޭޖްޑް ކެއަރ މޯލްޑިވްސް

ސްޕެޝަލް ރެކޮގްނިޝަން އެވޯޑް: ޖަމިއްޔަތުއް ތައާވުން، ޑޭލައިޓް ކްލަބް، ދިވެހިރާއްޖޭގެ ސްކައުޓް ޖަމިއްޔާ، ގާލް ގައިޑް އެސޯސިއޭޝަން އޮފް މޯލްޑިވްސް