ޝޫޓިން އެސޯސިއޭޝަން އޮފް މޯލްޑިވްސްއާ މިނިސްޓަރ ޢަބްދުﷲ ރާފިޢު ބައްދަލުކުރައްވައިފި އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާގައި އޮތް ބައްދަލުކުރެއްވުމުގައި ދިވެހިރާއްޖޭގައި ޝޫޓިން ކުރިއެރުވުމަށް ދިމާވެފައިވާ ގޮންޖެހުންތަކާ ގުޅޭގޮތުން މަޝްވަރާކުރެވުނެވެ. އެސޯސިއޭޝަންގެ އެންމެ ބޮޑު ކަންބޮޑުވުމަކީ ތަމްރީންތަކަށް އެކަށީގެންވާ ޖާގައެއް ނެތުމެވެ. މިގޮތުން އެ އެސޯސިއޭޝަނުން މިހާރު ބޭނުންކުރަމުން އަންނަ ފެސިލިޓީގައި ތަމްރީން ޕްރޮގްރާމްތައް ކުރިއަށް ގެންދިޔުމުގައި ހުރި ދަތިތައް ވަނީ މިނިސްޓަރ ރާފިޢުއާ ހިއްސާކޮށްފަ އެވެ.

މިނިސްޓަރ ރާފިޢު ވަނީ ޖާގައިގެ ދަތިކަން ހައްލުކުރުމަށް އެކަށީގެންވާ ހައްލެއް ހޯއްދަވައިދެއްވާނެކަމަށް ވިދާޅުވެފަ އެވެ.

ޝޫޓިން އެސޯސިއޭޝަނުން ވަނީ މިހާރު އެ އެސޯސިއޭޝަނުން ފަށައިގެން އުޅޭ ސްކޫލް ކުދިން ތަމްރީންކުރުމުގެ ޕްރޮގްރާމްގެ ތަފްސީލްތައްވެސް ހިއްސާކޮށްފަ އެވެ. މިގޮތުން ދާދި ފަހުން ބޭއްވި ޝޫޓިން މުބާރާތުގައި ވާދަކޮށް ސްކޫލްތަކުގެ ކުދިން ހޯދާފައިވާ ކުރިއެރުން އެ އެސޯސިއޭޝަނުން ފާހަގަކުރި އެވެ.