ސަރުކާރުގެ ބަޖެޓުގައި މި އަހަރު ތިންވަނައަށް އެންމެ ބޮޑު އިސްކަމެއް ދެއްވަނީ ކުޅިވަރާއި، ފިޓްނަސްއަށް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެ އެވެ.

ރަށް ރަށުގައި ކުޅިވަރު ވަސީލަތްތައް ޤާއިމްކުރުމުގައި ސަރުކާރުން އިސްކަންދެއްވާ މިންވަރު ހާމަކުރައްވާ ރައީސުލްޖުމްހޫރިއްޔާ ވާހަކަފުޅު ދެއްކެވީ މިހާރު ހއ.އަތޮޅުގެ ރަށްތަކަށް ކުރަވަމުން ގެންދަވާ ދަތުރުފުޅުގަ އެވެ.
ރައީސް ވިދާޅުވީ ސަރުކާރުގެ ބަޖެޓުން ބޮޑު ހޭދައެއް މި އަހަރު ކުޅިވަރުގެ އެކި އެކި ކަންކަމަށް ހަރަދުކުރައްވާނެކަމަށެވެ. މިގޮތުން ރާއްޖޭގެ އެކި ރަށްރަށުގައި ފުޓްބޯޅަ ދަނޑާއި، ފުޓްސަލް ދަނޑުތަކުގެ އިތުރުން ވޮލީކޯޓާއި، ހޭންޑްބޯޅަ ކޯޓުތައް އެޅުމަށްވެސް ކުޅިވަރު ވުޒާރާގެ ތެރެއިން ބޮޑު ހޭދައެއް ކުރައްވާނެ ކަމަށެވެ. 

މީގެ އިތުރުން ދުޅަހެޔޮ މުޖުތަމަޢުއެއް ބިނާކުރުމަށް ބޭނުންވާ ކަންކަމަށްވެސް އިސްކަންދެއްވައިގެން ކުޅިވަރު ވުޒާރާ އިން ގިނަ ކަންކަން ކުރައްވާނެކަމަށް އޭނާ ވިދާޅުވި އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން މިދިޔަ އަހަރުވެސް ވަނީ ދުޅަހެޔޮ މުޖުތަމަޢުއެއް ބިނާކުރުމަށް މުޅި ރާއްޖެއަށް ހުޅުވާލައިގެން ބޮޑު ޕްރޮގްރާމެއް ހިންގާފަ އެވެ. ސަރުކާރުގެ 52 ހަފްތާގެ ތެރޭގައި "ހަށިހެޔޮ ރާއްޖެ" ޕްރޮގްރާމް ހިންގުމަށް ބޭނުންވާ އިންސާނީ ވަސީލަތްތައް ތަރައްގީ ކުރުމުގެ މަގްސަދުގައި ރާއްޖޭގެ ހުރިހާ ރަށަކުން 260 އަށްވުރެ ގިނަ ލީޑަރުން ވަނީ ތަމްރީންކޮށްފަ އެވެ.