ސަލާހުއްދީން ޕާކިންގައި މާލޭ ސިޓީ ކައުންސިލުން ހިންގި އައުޓްޑޯ ޖިމް ހަލާކުވުމާ ގުޅިގެން އެތަނުގައި ޖިމް އިކުއިޕްމަންޓްތައް އާކޮށް، މަރާމާތުކޮށް އަލުން ހުޅުވައިފި އެވެ.

ސަލާހުއްދީން ޕާކިންގެ ޖިމް އަލުން ހުޅުއްވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއާއި ސިޓީ ކައުންސިލްގެ މޭޔަރ އާދަމް އާޒިމްއެވެ.

މި ޖިމްގައި ހުރި ސާމާނުތައް ހަލާކުވެ، ބޭނުން ނުކުރެވޭ ވަރުވެފައިވާތި އަލުން މަރާމާތުކުރަން ފެށީ މިދިޔަ މެއި މަހުގެ ތެރޭގަ އެވެ. މިގޮތުން އެތަނުގައި ކުރިން ހުރި ސާމާނުތައް ނަގައި، ތަޅުންގަނޑު ރަނގަޅުކޮށް ފާރުތަކުގައި ކުލަ ލުމުގެ އިތުރުން، ސާމާނުތައް ވަނީ އާކޮށްފަ އެވެ.

ރާއްޖޭގައި ގާއިމްކޮށްފައިވާ ކުޅިވަރު ކުޅޭ ތަންތަން މަރާމާތުކޮށް އަލުން ބޭނުންކުރެވޭ ފެންވަރަށް ގެނައުމަކީ އަދުގެ ސަރުކާރުގެ މުހިންމު ވައުދެކެވެ. މި ވައުދުގެ ތެރެއިން މިހާތަނަށް ފުޓްސަލް ދަނޑުތަކާއި، ޖިމްތަކުގެ އިތުރުން އެހެން ކުޅިވަރުކުޅޭ ގިނަ ތަންތަނެއް ވަނީ މަރާމާތުކުރެވިފަ އެވެ.