ރޭސިން އަދި ޑްރިފްޓް އެރީނާ ތަރައްޤީކުރުމަށް ބޭނުންވާ ބިން ހައުސިންގް ޑިވަލޮޕްމަންޓް ކޯޕަރޭޝަން (އެޗްޑީސީ) އިން މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އާ ހަވާލުކޮށްފި އެވެ.

އެ ސަރަހައްދު ރަސްމީކޮށް ސްޕޯޓްސް މިނިސްޓްރީ އާ ހަވާލުކޮށްފައިވަނީ އެޗްޑީސީގައި މިއަދު ބޭއްވި ރަސްމިއްޔާތެއްގައެވެ.

މި އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު ފަޒުލް ރަޝީދެވެ. އަދި ސްޕޯޓްސް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޢަބްދުﷲ ރާފިޢު އެވެ.

ރޭސިން އަދި ޑްރިފްޓް އެރީނާ ޤާއިމްކުރުމަށް ގްރޭޓަރ މާލެ ރީޖަންއިން 50،000 އަކަފޫޓުގެ ބިމެއް ހައުސިންގް ޑިވަލޮޕްމަންޓް ކޯޕަރޭޝަނުން ވަނީ ސްޕޯޓްސް މިނިސްޓްރީ އާ ހަވާލުކޮށްފައެވެ.

މި އެއްބަސްބުމުގައި ސޮއިކުރެއްވުމަށްފަހު މިނިސްޓަރ ރާފިޢު ވަނީ ކުޅިވަރު ކުރިއެރުމަށް ވަސީލަތްތައް ގާއިމުކޮށްދެއްވުމަށް ރައީސުލްޖުމްހޫރިއްޔާ ކުރައްވަމުންގެންދަވާ މަސައްކަތްތަކަށް ޝުކުރު އަދާކުރައްވާފައެވެ.

އެޗްޑީސީގެ މެނޭޖިން ޑިރެކްޓަރު ފަޒަލް ރަޝީދު ވިދާޅުވީ އެ ކުންފުނިން މަސައްކަތް ކުރާނީ ރައީސްގެ މެނިފެސްޓޯ ތަންފީޒުކުރަން ކަމަށާއި، އެއްބަސްވުމުގެ ދަށުން މިނިސްޓްރީގެ އިތުރުން ދެ އެސޯސިއޭޝަނާއެކުވެސް މަޝްރޫއުގެ މަސައްކަތް ކުރިއަށް ގެންދަވާނެކަމަށް ވިދާޅުވިއެވެ.