ރާއްޖޭގައި މިހާތަނަށް ބޭއްވި އެންމެ އަގުބޮޑު ''ރަންތާޖު ޤުރުއާން'' މުބާރާތުގެ އެއްވަނަ ނ.ހޮޅުދޫއަށް ނިސްބަތްވާ މުހައްމަދު ސާއީ މުބާރިކް ހޯދައިފިއެވެ.

މި މުބާރާތުގެ އެއްވަނަ  މުހައްމަދު ސާއީ މުބާރިކް ހާސިލްކޮށްފައިވާއިރު، ދެ ވަނަ ހާސިލްކޮށްފައިވަނީ  ފާތިމަތު ތުގާ ހަލީމެވެ. އަދި ތިން ވަނަ ހާސިލްކޮށްފައިވަނީ  ޔައީޝް މުހައްމަދު ނިޔާޒެވެ. އަދި ހަތަރު ވަނަ އަހުމަދު ސުޖާއު ހާސިލްކޮށްފައިވާއިރު، ފަސް ވަނަ ހާސިލްކޮށްފައިވަނީ  މުހައްމަދު މުސްތަފާއެވެ.

މުބާރާތުގެ އެއްވަނަ ހޯދި ސާއީއަށް އިނާމް ހަވާލުކޮށްދެއްވީ، ''ރަންތާޖު'' ޤުރުއާން މުބާރާތް ނިންމުމުގެ ޙަފްލާގެ ޝަރަފްވެރި މެހެމާން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހެވެ.

މި ރަސްމިއްޔާތުގައި ރައީސުލްޖުމްހޫރިިއްޔާގެ އިތުރުން ރައީސުލްޖުމްހޫރިއްޔާގެ ނައިބު ފައިސަލް ނަސީމް އަދި އިސްލާމިކް މިނިސްޓަރ ޑރ. އަހުމަދު ޒާހިރު އަލީގެ އިތުރުން ރާއްޖެ ޓީވީގެ އިސްވެރިންވެސް ވަނީ މި ރަސްމިއްޔާތުގައި ބައިވެރިވެފައެވެ.

 މި މުބާރާތުގެ އެއްވަނައަށް ހޯދި ސާއީ އަށް  3 ލައްކަ ރުފިޔާގެ އިނާމެއް ވަނީ ލިބިފައެވެ. އަދި ދެވަނައަށް ދިޔަ ތުގާއަށް 1 ލައްކަ ރުފިޔާ، އަދި ތިންވަނައަށް ދިޔަ  ނިޔާޒަށް 75000 ރުފިޔާ ވަނީ ލިބިފައެވެ. މީގެ އިތުރުން ސްޕޮންސަރުންގެ ފަރާތުން ގިނަ އަދަދެއްގެ އިނާމްތައް މި 3 ބައިވެރިންނަށް ވަނީ ލިބިފައެވެ. 

މި މުބާރާތް ކުރިއަށް ގެންދިޔައީ 111 މީހުން ބައިވެރިވި އޮޑިޝަނުން ހޮވުނު 20 ބައިވެރިންގެ މެދުގައެވެ.

 މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަދި އިސްލާމިކް މިނިސްޓްރީ ގުޅިގެން ކުރިއަށްގެންދިޔަ މުބާރާތެކެވެ.