ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހއ. އިހަވަންދޫގައި ތަރައްޤީކުރި ފުޓްސަލް ދަނޑު ރަސްމީކޮށް މިއަދު ހުޅުއްވާދެއްވައިފި އެވެ.

އިހަވަންދޫ ފުޓްސަލް ދަނޑު ރައީސުލްޖުމްހޫރިއްޔާ ހުޅުއްވައިދެއްވީ ހއ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ. ފުޓްސަލް ދަނޑު ހުޅުވުމުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ކެބިނެޓުގެ އެހެން ވަޒީރުންނާއި، އެ ރަށު ކައުންސިލްގެ އިސްވެރިންވެސް ބައިވެރިވެވަޑައިގެންނެވި އެވެ.

މި ފުޓްސަލް ދަނޑު ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ އެ ރަށުގެ ކުދިންނާއިއެކު ފުޓްސަލް ދަނޑުގައި ވަގުތުކޮޅެއް ހޭދަކުރައްވާފަ އެވެ. 

އިހަވަންދޫ ފުޓްސަލް ދަނޑަކީ އެ ރަށު ކައުންސިލުން އިސްނަގައިގެން، ކުޅިވަރު ވުޒާރާއާ ގުޅިގެން ކުރިއަށްގެންދިޔަ މަޝްރޫޢުއެކެވެ. މި ފުޓްސަލް ދަނޑުގެ މަސައްކަތަށް އަހަރެއްހާ ދުވަސް ހޭދަވި އެވެ.