ދިވެހިރާއްޖޭގައި މިހާތަނަށް ހަދާފައިވާ ޖާގައިގެ ގޮތުން އެންމެ ތަނަވަސް ޓީޓީ ހޯލް “މާލެ ޓީޓީ ހޯލް” ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހުޅުވައިދެއްވައިފިއެވެ.

ޓީޓީ ހޯލު ހުޅުވައިދެއްވުމަށް މިއަދު ހަވީރު ހ.މުނިއުފާގައި ބޭއްވި ރަސްމިއްޔާތުގައި ރައީސްގެ އަރިހުގައި ރައީސުލްޖުމްހޫރިއްޔާގެ ނައިބު ފައިސަލް ނަސީމް އަދި ޔޫތު މިނިސްޓަރ އަޙުމަދު މަޙްލޫފް ވެސް ވަނީ ބައިވެރިވެވަޑައިގެންފައެވެ. އަދި މޯލްޑިވްސް އޮލިމްޕިކް ކޮމިޓީ އާއި ޓީޓީ އެސޯސިއޭޝަނުގެ އިސް ފަރާތްތައް ވެސް ބައިވެރިވެވަޑައިގެންނެވިއެވެ.

ކުޅިވަރުގެ ދާއިރާ ހަރުދަނާކޮށް ކުރިއެރުވުމަށް ސަރުކާރުން ގެންގުޅޭ ސިޔާސަތުގެ ދަށުން މިއަދު ހުޅުވިގެން މިދިޔަ ޓީޓީ ހޯލުގައި 12 ބޭޒު ހުންނާނެއެވެ. މީގެ އިތުރުން މި ސަރުކާރުން 2021 ވަނަ އަހަރު ވަނީ ޓީޓީ ހޯލް އެއް ހުޅުމާލޭގައި ހުޅުވާފައެވެ. އަދި މިއަހަރު ފުވައްމުލައް ސިޓީގައިވެސް ޓީޓީ ހޯލް އެއްވަނީ ހުޅުވާފައެވެ.