ޕާކިސްތާން އެމްބަސީއިން ދިވެހިރާއްޖެއަށް ގިނަ އަދަދެއްގެ ކުޅިވަރު ސާމާނު ހަދިޔާކޮށްފި އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާގައި އޮތް ހާއްސަ ރަސްމިއްޔާތެއްގައި ޕާކިސްތާންގެ ފަރާތުން ހަދިޔާކުރި ކުޅިވަރު ސާމާނުތަކުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. ޕާކިސްތާން އެމްބަސީގެ ފަރާތުން ސޮއިކުރެއްވީ ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވައިސް އެޑްމިރަލް ރިޓަޔާޑް މުހައްމަދު ފައްޔާޒް ގިލާނީ އެވެ.

ޕާކިސްތާނުން ދިވެހިރާއްޖެއަށް ހަދިޔާކުރި ކުޅިވަރު ސާމާނުގެ ތެރޭގައި ހިމެނެނީ ކްރިކެޓް ބެޓްތަކާއި، ކްރިކެޓް ބޯޅަތަކާއި ކްރިކެޓްގައި ބޭނުންކުރާ އެހެނިހެން ސާމާނުތަކުގެ އިތުރުން 500 ފުޓްބޯޅަ އެވެ.

ކުޅިވަރާއި ހަށިހެޔޮކަމާ ބެހޭ ވުޒާރައިގައި އޮތް ހާއްސަ ރަސްމިއްޔާތުގައި ކުޅިވަރު ސާމާނުތަކާ ހަވާލުވެލެއްވުމަށްފަހު ވަޒީރު ރާފިޢު ވަނީ ދިވެހިރާއްޖޭގެ ކުޅިވަރު ކުރިއެރުވުމަށް ޕާކިސްތާނުން ވެދެއްވަމުން ގެންދަވާ އެހީތެރިކަން ފާހަގަކުރައްވާފަ އެވެ. ވަކިން ހާއްސަކޮށް ރާއްޖޭގެ ކްރިކެޓް ކުރިއެރުވުމަށް ޕާކިސްތާނުން ލިބެމުން އަންނަ އެހީތެރިކަން ފާހަގަކުރެއްވި އެވެ.