ފްރާންސްގެ ވެރިރަށް ޕެރިހުގައި ކުރިއަށްދިޔަ އޮލިމްޕިކް ގޭމްސްގައި ވާދަކުރި ރާއްޖޭގެ ކޮންޓިންޖެންޓް އެނބުރި މާލެ އައުމުން، ކުޅިވަރާއި ހަށިހެޔޮކަމާ ބެހޭ ވަޒީރު، ހޫނު މަރުޙަބާއެއް ދަންނަވައިފި އެވެ.

މި ފަހަރުގެ އޮލިމްޕިކްސްގައި ރާއްޖެއިން ފުރަތަމަ ފަހަރަށް ހަތަރު ކުޅިވަރެއްގައި ބައިވެރިވި އެވެ. އެއީ ބެޑްމިންޓަނާއި، އެތުލެޓިކްސް އާއި، ސްވިމިން އަދި ޓޭބަލް ޓެނިހެވެ. މިއީ ރާއްޖޭގެ ކުޅިވަރު ތާރީޚުގައިވެސް އޮލިމްޕިކްސްއަށް އެންމެ ގިނަ ކުޅިވަރުގެ ބައިވެރިވުމާއެކު، ބޮޑު ކޮންޓިންޖެންޓެއް ދިޔަ ފަހަރެވެ.

ރާއްޖޭގެ ކޮންޓިންޖެންޓް އެނބުރި މާލެ އައުމުން، ވެލާނާ އިންޓަރނޭޝަނަލް އެއާޕޯޓުން މަރުހަބާ ދެންނެވީ, ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލް އެވެ. މީގެ އިތުރުން ކުޅިވަރު ވުޒާރާ އާއި ގައުމީ ކުޅިވަރު އެސޯސިއޭޝަންތަކުގެ ރައީސުންވެސް ބައިވެރިވެވަޑައިގެންނެވި އެވެ.