ފްރާންސްގެ ވެރިރަށް ޕެރިހުގައި އޮންނަ އޮލިމްޕިކް ގޭމްސްގައި ވާދަކުރާ ދިވެހި އެތުލީޓުންނަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ހިތްވަރު ދެއްވައިފި އެވެ.

އޮލިމްޕިކް ގޭމްސްގައި މިއަހަރު ދިވެހިރާއްޖެއިން ހަތަރު ކުޅިވަރެއްގައި ފަސް އެތުލީޓަކު ވާދަކުރާނެ އެވެ. އެއީ ޓޭބަލް ޓެނިހުން ފާތިމަތު ދީމާ އަލީ، ބެޑްމިންޓަންގެ އަންހެން އިވެންޓުގައި ވާދަކުރާ ފާތިމަތު ނަބާހާ އަބްދުއްރައްޒާގް، ދެ ފެތުންތެރިންކަމަށްވާ މުހައްމަދު އާން ހުސައިން އާއި އައިޝަތު އުލްޔާ ޝާއިގް އެވެ. ދެން ވާދަކުރަނީ އެތުލެޓިކްސް އިން އިބާދުﷲ އާދަމް އެވެ.

އޮލިމްޕިކް ގޭމްސްގައި ދިވެހިރާއްޖޭގެ ދިދަ އުފުލާ އެތުލީޓުން ހޮވުމަށް އޮތް ރަސްމިއްޔާތުގައި ވާހަކަދައްކަވަމުން މިނިސްޓަރ ރާފިޢު ވަނީ ގޭމްސްގައި ވާދަކުރާ އެތުލީޓުންނަށް ލިބިފައިވާ ޝަރަފް، އިތުރަށް ދަމަހައްޓައި ކުޅިވަރުގެ ރޮނގުން ރާއްޖެ ތަމްސީލްކޮށް، ޕާފޯމްކުރެވެން އޮތް އެންމެ ވަރުގަދަކޮށް ވާދަކޮށް، ކުރިއަށްވުރެ ރަނގަޅު ނަތީޖާތަކެއް ހާސިލްކުރުމަށް އެދިވަޑައިގަންނަވާފަ އެވެ.