އުރީދޫ މޯލްޑިވްސްގެ ދައުވަތަކަށް ދިވެހިރާއްޖެ އައި ޖޭ ޖޭ އޮކޯޗާއާ އެކު ކުޅުނު އެކުވެރިކަމުގެ ފުޓްސަލް މެޗުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ކުޅުއްވައިފި އެވެ.

ގަލޮޅު ރަސްމީ ދަނޑުގައި ކުރިއަށްދިޔަ މި މެޗުގައި މިނިސްޓަރ ރާފިޢު ކުޅުއްވީ ލެޖެންޑުންގެ ޓީމަށެވެ. އޮކޯޗާ ކެޕްޓަންކަން ކުރި މި ޓީމަށް ރައީސުލްޖުމްހޫރިއްޔާގެ ނައިބު ހުސެއިން މުހައްމަދު ލަތީފް (ސެމްބެ) އާއި ގައުމީ ޓީމްގެ ކުރީގެ ދެ ކެޕްޓަނުންކަމަށްވާ އަލީ އަޝްފާގް އާއި މުޙައްމަދު ކަލީމްގެ އިތުރުން އުރީދޫގެ ސީއީއޯ ހާލިދު އަލް ހަމާދީވެސް ކުޅުއްވި އެވެ. ލެންޖްޑުން ޓީމްގެ ކޯޗަކީ ގައުމީ ފުޓްބޯޅަ ޓީމުގެ ކޯޗު އަލީ ސުޒޭން އެވެ.

މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅުނު މި މެޗުން ލެޖެންޑުންގެ ޓީމް ބަލިވީ 5-7 ގެ ނަތީޖާއަކުންނެވެ.

އުރީދޫގެ ދައުވަތަށް ރާއްޖެ އައި އޮކޯޗާ ވަނީ ޕީއެސްޖީ އެކަޑަމީ ކޯޗިން ކްލިނިކާ އެކު ކުޑަކުދިންނަށް ހާއްސަކޮށްގެން ހަރަކާތެއް މާލޭގައި ހިންގާފަ އެވެ. އަދި ލާމު އަތޮޅުގައި ކުރިއަށްދިޔަ އުރީދޫ ފަން ރަންގައިވެސް އޭނާ ވަނީ ބައިވެރިވި އެވެ.