ގައުމީ ފުޓްބޯޅަ ޓީމަށާއި ފުރަތަމަ ޑިވިޝަންގެ ގިނަ ޓީމުތަކަށް ކުޅެފައިވާ ހުނަރުވެރި މިޑްފީލްޑަރު، މުހައްމަދު އާރިފް (ބަކާ)، ގެ ހަނދާނުގައި ތަޢުޒިޔާގެ ދަފްތަރެއް ހުޅުވައިފި އެވެ.

ރަސްމީ ފުޓްބޯޅަ ދަނޑުގައި އޮތް ރަސްމިއްޔާތެއްގައި ތައުޒިޔާގެ ދަފްތަރު ހުޅުއްވައިދެއްވީ ކުޅިވަރާއި ހަށިހެޔޮކަމާއި ބެހޭ މިނިސްޓަރ ޢަބްދުﷲ ރާފިޢު އެވެ.

މި ދަފްތަރުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިސްވެރިންގެ އިތުރުން، ޤައުމީ ޓީމަށް ކުރިން ކުޅެފައިވާ ކުޅުންތެރިންނާއި، ކުޅިވަރު އާއިލާގެ ޚިދުމަތްތެރިންގެ އިތުރުން، އެކިއެކި ކޯޗުން ވެސް ވަނީ ސޮއިކޮށްފަ އެވެ. އަދި ކުރީގެ މަޝްހޫރު ކުޅުންތެރިންގެ ތެރެއިން އަލީ އަޝްފާގު (ދަގަނޑޭ)، ގޯލްކީޕަރު އިމްރާން މުޙައްމަދު އަދި އިބްރާހިމް ފަޒީލް (އޮއްޕޮ) ފަދަ ކުޅުންތެރިން ވަނީ މި ދަފުތަރުގައި ލިޔެފައެވެ.

ބަކާގެ ހަނދާނުގައި މި ހުޅުވި ތަޢުޒިޔާގެ ދަފްތަރު، މިހާރު ކުރިއަށްދާ އެފްއޭއެމް ނަވާރަ އަހަރުން ދަށުގެ ޔޫތް ޗެމްޕިއަންޝިޕު ނިމެންދެން ރަސްމީ ފުޓްބޯޅަ ދަނޑުގައި ބެހެއްޓިފައި ހުންނާނެއެވެ.