މިއަހަރުގެ މޯލްޑިވްސް ސްޕޯޓްސް އެވޯޑްސް މި މަހުގެ 16 ދުވަހު ބާއްވަން ނިންމައިފިއެވެ.

މިމަހުގެ 16 ވަނަ ދުވަހު މޯލްޑިވްސް ސްޕޯޓްސް އެވޯޑްސް އޮންނާނެކަން އިޢުލާންކުރެއްވީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަޙްލޫފް ކުރެއްވި ޓްވީޓެއްގައެވެ.

މިއީ މި މިނިސްޓްރީން މޯލްޑިވްސް ސްޕޯޓްސް އެވޯޑްސް ބާއްވާ 2 ވަނަ އަހަރެއެވެ. އެންމެ ފުރަތަމަ މި އެވޯޑް ނައިޓް ބާއްވާފައިވަނީ މިދިޔަ އަހަރުއެވެ.

މޯލްޑިވްސް ސްޕޯޓްސް އެވޯޑަކީ ކުޅިވަރުގައި ޝާމިލުވެ އުޅޭ އެކި ފަރާތްތަކުގެ އަގުވަޒަންކުރުމަށް ދޭ އެވޯޑެކެއެވެ. މި އެވޯޑުގައި ކޮންމެ ކުޅިވަރަކުން ވަކިވަކިން އަންހެން އަދި ފިރިހެން ހިމެނޭގޮތަށް އެންމެ މޮޅު ކުޅިވަރު އެތުލީޓުން ހޮވާނެ އެވެ. އެތުލީޓުން ހޮވާނީ އެކަމަށް ކަނޑައަޅާ ޖަޖުންގެ ޕެނަލަކުންނެވެ.

މިދިޔަ އަހަރު ބޭއްވި އެވޯޑް ނައިޓް އެކޭ އެއްގޮތަށް މިފަހަރުގެ ސްޕޯޓްސްް އެވޯޑްސް ހަފްލާގައި ބައިވެރިވުމަށް ދުނިޔޭގެ ކުޅިވަރުގައި ވިދަމުން އަންނަ ފަރާތްތަކާއި ކުރީގެ ލެޖެންޑުން ރާއްޖެ އައުމަށް ވަނީ ހަމަޖެހިފައެވެ.