މި އަހަރުގެ މޯލްޑިވްސް ސްޕޯޓްސް އެވޯޑްސް އަންނަ މަހުގެ 27 ވަނަ ދުވަހު ބާއްވަން ނިންމައިފި އެވެ.

ރާއްޖޭގެ ކޮންމެ ކުޅިވަރެއްގެ އެންމެ މޮޅު އެތުލީޓު ހޮވުމުގެ އިތުރުން އަހަރުގެ އެންމެ މޮޅު އެތުލީޓު ހޮވާ މުހިންމު އެވޯޑާ ގުޅޭ މައުލޫމާތު ހިއްސާކުރުމަށް މިއަދު ވަނީ ނޫސްވެރިންގެ ބައްދަލުވުމެއް ބާއްވާފަ އެވެ. މި ބައްދަލުވުމުގައި އެވޯޑުގެ ފަނޑިޔާރުން ވަނީ އެކި އެކި ކަންކަމާ ގުޅޭ މައުލޫމާތު ދެއްވާފަ އެވެ. 

އެވޯޑުގެ ފަނޑިޔާރުންގެ ގޮތުގައި މިއަހަރުވެސް ތިއްބަވަނީ މީގެ ކުރިން ވެސް ސްޕޯޓްސް އެވާޑުގެ ފަނޑިޔާރުންގެ ގޮތުގައި ތިއްބެވި، ކުރީގެ ބާސްކެޓުބޯޅަ ކުޅުންތެރިޔާ، އަބްދުއް ނާފިއު ތައުފީގް އާއި ފީފާ އާއި އޭއެފްސީގެ މެޗު ކޮމިޝަނަރު، އަހުމަދު ޝާހިރު އާއި ކުރީގެ ފީފާ ރެފުރީ އަލީ ސަލީމުގެ އިތުރުން ޓޭބަލް ޓެނިސް އެސޯސިއޭޝަނުގެ ކުރީގެ ޖެނެރަލް ސެކްރެޓަރީ އިސްމާއިލް ސުޖާއު އަދި ސްޕޯޓްސް މެނޭޖްމަންޓްގެ ދާއިރާއިން މާސްޓާސް ހާސިލްކުރައްވާފައިވާ އާމިނަތު ނާޝިދާ (ނާޝް) އެވެ.

ސްޕޯޓްސް އެވާޑުގެ ފަނޑިޔާރުންގެ ކޮމިޓީން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޓީގެ ޗެއާ، އަބްދުލް ނާފިއު ތައުފީގު ވިދާޅުވީ މި އަހަރުގެ ސްޕޯޓްސް އެވޯޑަށް ހުށަހަޅާފައިވާ މައުލޫމާތުތަކުގެ ސައްޙަކަން ދެނެގަތުމާއި ވަނަ ހޮވުމުގައި އާޓިފިޝަލް އިންޓެލިޖެންސް (އޭއައި)ގެ ބޭނުންކޮށްފައިވާނެކަމަށެވެ.

ނާފިއު ވިދާޅުވީ މިދިޔަ ދެ އަހަރެކޭ އެއްގޮތަށް މިއަހަރުވެސް ބައެއް ވަނަތައް ހޮވުމުގައި ގޮންޖެހުންތަކެއް ދިމާވިކަމަށާއި، އޭގެ ތެރެއިން އެންމެ ބޮޑަށް ފާހަގަކޮށްލެވެނީ އެކި ކުޅިވަރުތަކުގައި ޕޮއިންޓްދޭ އުސޫލުތަކުގައި ތަފާތުތަކެއް ހުރުމުން އެކަމަށް ދޭން ޖެހޭ ސަމާލުކަންކަމަށެވެ.