ކުޅިވަރުގެ ދާއިރާގައި އުޅޭ ފަރާތްތަކުގެ އަގު ވަޒަންކުރުމުގެ ގޮތުން ބާއްވާ މޯލްޑިވްސް ސްޕޯޓްސް އެވޯޑްސް 2023 ގާލާ ނައިޓްގައި އަހަރުގެ އެންމެ މޮޅު އެތުލިޓުގެ މަގާމު ޓޭބަލް ޓެނިސް ކުޅުުންތެރިޔާ، ފާތިމަތު ދީމާ އަލީ އާއި ބޮޑީބިލްޑަރު، އަޒްނީން ރަޝާދު ހޯދައިފިއެވެ.

މާލެ ކުޅިވަރު އެކުވެނި ސިންތެޓިކް ޓްރެކްގައި ބޭއްވި މޯލްޑިވްސް ސްޕޯޓްސް އެވޯޑްސް ގާލާ ނައިޓް ޝަރަފްވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއެވެ. މީގެ އިތުރުން ހާއްސަ މެހެމާނުންގެ ގޮތުގައި ރާއްޖޭން ބޭރުން އައި ކުޅިވަރު ލެޖެންޑުންވެސް ވަނީ މި އެވޯޑް ނައިޓުގައި ބައިވެރިވެފައެވެ.

މި އެވޯޑް ހަފްލާގައިވަނީ ހިދުމަތުގެ އަގުވަޒަންކުރުމުގެ ގޮތުން ފަސް ފަރާތަކަށް "ލައިފްޓައިމް އެޗީވްމެންޓް އެވޯޑް" ދީފައެވެ. އަދި މީގެ އިތުރުން އަގުވަޒަންކުރުމުގެ ގޮތުން ރިކޮގްނިޝަން އެވޯޑް 16 ފަރާތަކަށް ދިންއިރު، އައިކަން އެވޯޑް ވަނީ އަށް ފަރާތަކަށް ދީފައެވެ. މީގެ އިތުރުން މިދިޔަ އަހަރު ރާއްޖޭގެ ކުޅިވަރަށް ރަން ވަަނަތަަށް ޙޯދައިދިން ފަރާތްތަކުގެ އަގުވަޒަންކޮށް، ފައިސާގެ އިނާމް ދިނުން ވެސް އޮތެވެ.

މި އެވޯޑް ނައިޓުގައި ވަނީ އެކިއެކި ކުޅިވަރުތަކުން އެންމެ މޮޅު އަންހެން އަދި ފިރިހެން އެތުލީޓު ހޮވާފައެވެ. އަދި މީގެ އިތުުރުން އެންމެ ރަނގަޅު ކުޅިވަރު އެސޯސިއޭޝަން، އެންމެ މޮޅު ކޯޗު (އަންހެން/ފިރިހެން) އަދި އެއްވަނަ ސްޕޯޓްސް މެޑިކް ވެސް ހޮވާފައެވެ.

މީގެ އިތުރުން އެންމެ މޮޅު ކުޅިވަރު ނޫސްވެރިޔާގެ މަޤާމާއި، އެންމެ މޮޅު ފޮޓޯގްރާފަރުގެ މަޤާމުގެ އިތުރުން އެންމެ ރަނގަޅު އޮންލައިން/ބްރޯޑްކާސްޓް މީޑިއާ އަށްވެސް މި ހަފްލާގައި ވަނީ އެވޯޑް ދީފައެވެ.