އައިބީސީ ވޯލްޑް ޓުއާގައި މޯލްޑިވްސް ޕްރޯ ބޮޑީބޯޑިން މުބާރާތް އަންނަ އޮގަސްޓް މަހު ރާއްޖޭގައި ބާއްވަން ނިންމާފައިވާކަން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އިއުލާންކުރައްވައިފި އެވެ.

ދުނިޔޭގެ އެންމެ މަޝްހޫރު ބޮޑީބޯޑަރުން ވާދަކުރާ މޯލްޑިވްސް ޕްރޯ މިއަހަރު ބާއްވަން ނިންމާފައިވަނީ އޮގަސްޓް މަހުގެ އެކަކުން ނުވަޔަކަށް މާލޭ ވަރުނުލާ ރާޅުގަނޑު ސަރަހައްދުގަ އެވެ. މި މުބާރާތް މިދިޔަ ދެ އަހަރުވެސް ކާމިޔާބުކަމާއިއެކު ރާއްޖޭގައިވަނީ ބައްވާފަ އެވެ. 

މޯލްޑިވްސް ޕްރޯ 2024 ރާއްޖޭގައި މިއަހަރު އޮންނާނެކަން މިނިސްޓަރު ރާފިޢު އިޢުލާންކުރެއްވީ މިދިޔަ ބުރާސްފަތި ދުވަހު ނިމުނު ބުރުނު ޝިކާރު ބޮޑީބޯޑިން ޗެލެންޖުގެ އިނާމް ދިނުމުގެ ރަސްމިއްޔާތުގަ އެވެ. މި ރަސްމިއްޔާތުގައި ވާހަކަދައްވަމުން މިނިސްޓަރ ރާފިޢު ވިދާޅުވީ ރާއްޖެއަކީ ދުނިޔޭގެ ނިސްބަތުން އެންމެ ރީތި ރާޅުތައް ނަގާ ގައުމުތަކުގެ ތެރޭގައި ހިމެނޭ ގައުމެއްކަމަށާއި، މިއަހަރުވެސް މޯލްޑިވްސް އޯޕަން ބާއްވާނެކަމުގެ ޔަގީންކަން މިހާރު އެސޯސިއޭޝަނަށް ދީފައިވާނެކަމަށެވެ. އަދި  މި މުބާރާތުގައި ދިވެހިރާއްޖޭގެ ބޮޑީބޯޑަރުން މިއަހަރުވެސް ރަނގަޅު ކާމިޔާބީތަކެއް ހޯދާނެކަމަށް އުއްމީދުކުރައްވާކަމަށެވެ. 

މޯލްޑިވްސް ޕްރޯގެ ކުރީގެ މުބާރާތްތަކަށް ބަލާއިރު، 2022 ވަނަ އަހަރު ޖޫނިއާ ބައިގެ ފައިނަލްގައި ރާއްޖޭގެ އާމިން އުމަރު މޫސާ ވާދަކުރި އެވެ. އަދި ޑްރޮޕް ނީ ބައިގެ ސެމީ ފައިނަލުގައި ރާއްޖޭގައި އުފެދުނު އެންމެ މޮޅު ބޮޑީބޯޑަރު, އަލީ ޚުޝްރުވާން (ކުޑަ އައްޔަ) ވާދަކުރި އެވެ.