ރާއްޖޭގެ ޤައުމީ ޓީމުތަކުން މި މަހު ވާދަކުރި ބައިނަލްއަޤްވާމީ މުބާރާތްތަކުގައި ހޯދި ކާމިޔާބީ ފާހަގަކޮށް އެ ޓީމްތަކަށް މިނިސްޓަރު އަޙްމަދު މަޚުލޫފު ހިތްވަރު ދެއްވައިިފިއެވެ.

ޒުވާނުންގެ މަރުކަޒުގައި ރޭގަނޑުގެ ފަރިއްކޮޅަކާއެކު ބޭއްވި ބައްދަލުކުރެއްވުމުގައި މިނިސްޓަރ ބައްދަލުކުރެއްވި ޤައުމީ ޓީމުތަކަކީ ޤައުމީ އަންހެން ހޭންޑްބޯޅަ ޓީމައި، ޒުވާން ޓީޓީ ޓީމު، ޤައުމީ އަންހެން ވޮލީބޯޅަ ޓީމު އަދި ޤައުމީ ބާސްކެޓްބޯޅަ ޓީމުގެ އިތުރުން ޤައުމީ ފުޓްބޯޅަ ޓީމެއެވެ.

އެގޮތުން އައިއެޗްއެފް ޓްރޮފީގެ ދެކުނު/ސެންޓްރަލް އޭޝިއާ ޒޯނުގައި ވާދަކޮށް ރާއްޖޭގެ އަންހެން 17 އަހަރުން ދަށުގެ ޓީމާއި 19 އަހަރުން ދަށުގެ ޓީމުން ވަނީ  ލޯ މެޑަލް ހޯދައި ތާރީހީ ކާމިޔާބެއް ހޯދާފައެވެ. މިއީ ބައިނަލްއަޤްވާމީ މުބާރާތްތަކުން ރާއްޖޭގެ ހޭންޑްބޯޅަ ޓީމެއް މެޑަލް ހޯދި ފުރަތަމަ ފަހަރުވެސްމެއެވެ.

މިނިސްޓަރ ބައްދަލުކުރެއްވި ޒުވާން ޓީޓީ ޓީމުން ވަނީ އިންޑިއާގެ އަރުނާޗަލް ޕްރަދޭޝްގައި މިމަހު ކުރިޔަށްގެންދިޔަ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް މުބާރަތުން 8 މެޑަލް ހޯދާފައެވެ. އޭގެ ތެރޭގައި ހިމެނެނީ ދެ ރިހި މެޑައްޔާއި ހަ ލޯ މެޑައްޔެވެ. 

މިނިސްޓަރ ދެން ބައްދަލުކުރެއްވީ އިންޑިއާގެ ބެންގަލޫރުގައި އަންނަ މަހު ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރާ ޤައުމީ ފުޓްބޯޅަ ޓީމާއެވެ. މި މުބާރާތަށް ތައްޔާރުވުމަށް ޤައުމީ ފުޓްބޯޅަ ޓީމު އަންނަ މަހުގެ 5 ވަނަ ދުވަހު ޖަޕާނުގައި ކޭމްޕް ކުރާނެއެވެ. އަދި އަންނަ މަހު ރާއްޖޭގައި ބާއްވާ ފައިވް ނޭޝަންސް ބާސްކެޓްބޯޅަ މުބާރާތުގައި ވާދަކުރާ ޤައުމީ ބާސްކެޓްބޯޅަ ޓީމާއިވެސް ބައްދަލުކުރައްވާ ދެ މުބާރާތުން ޤައުމަށް ރީތި ނަން ހޯދައިދީ ކާމިޔާބީ ހޯދުމަށް އެދި މިނިސްޓަރު ވަނީ ދެ ޓީމަށްވެސް ހިތްވަރުދެއްވާފައެވެ.

މީގެ އިތުރުން ނޭޕާލްގައި ނިމުނު ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕްގައި ވާދަކުރި ޤައުމީ އަންހެން ވޮލީބޯޅަ ޓީމާވެސް މިނިސްޓަރ ވަނީ ބައްދަލުކުރައްވާފައެވެ.