ރައީސުލްޖުމްހޫރިއްޔާގެ ވަޢުދުގެ ދަށުން 3000 ވަޒީފާގެ ފުރުސަތު ޒުވާނުންނަށް ހޯދައިދިނުމުގެ މަޤުސަދުގައި ކުރިއަށްގެންދާ އެޕްރެންޓިސްޝިޕް ޕްރޮގްރާމްގެ ދަށުން "މެރިއޮޓް އިންޓަރނޭޝަނަލް މޯލްޑިވްސް އެޕްރެންޓިސްޝިޕް ޕްރޮގްރާމް" ރައީސުލްޖުމްހޫރިއްޔާގެ ނައިބު ފައިޞަލް ނަސީމް އިފްތިތާޙްކޮށްދެއްވައިފިއެވެ.

އެޕްރެންޓިސްޝިޕް ޕްރޮގްރާމް އިފްތިތާޙްކުރުމަށް ޝެރަޓަން މޯލްޑިވްސް ފުލް މޫން ރިސޯޓް އެންޑް ސްޕާގައި ކުރިޔަށްގެންދިޔަ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ފައިސަލް ނަސީމްގެ އިތުރުން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފްގެ އިތުރުން މެރިއޮޓް އިންޓަރނޭޝަނަލް މޯލްޑިވްސްގެ އިސްވެރިންވެސް ވަނީ ބައިވެރިވެވަޑައިގެންފައެވެ.

ނޭޝަނަލް އެޕްރެންޓިސްޝިޕް ޕްރޮގްރާމްގެ ދަށުން ކުރިއަށްގެންދާ މިޕްރޮގްރާމްގައި 100 ކުއްޖަކު ތަމްރީންކުރުމަށް ވަނީ ހަމަޖެހިފައެވެ. މީގެތެރޭގައި ސެޓްފިކެޓް ލެވެލް 3ގެ އެކި ކޯސްތައް ހިމެނެއެވެ. އޭގެތެރޭގައި އިލެކްޓްރިކަލް އިންސްޓޮލޭޝަންއާއި، ފްރޮންޓް އޮފީސްއާއި، ހައުސްކީޕިންއާއި ލޯންޑްރީ ސަރވިސްއާއި ކޮމާޝަލް ކުކަރީއާއި ޕޭސްޓްރީ އެންޑް ބޭކަރީއާއި، ފުޑް އެންޑް ބެވަރޭޖް ސަރވިސްއާއި، ބަރިސްތާގެ އިތުރުން ލައިފް ގާޑިންގެ ދާއިރާ ހިމެނެއެވެ.

މި ޕްރޮގްރާމަކީ މަސައްކަތުގެ މާހައުލުގައި ތިބެގެން އެ މަސައްކަތުގެ ތަޖުރިބާކާރުންގެ ބެލުމުގެ ދަށުން މަސައްކަތް ދަސްކޮށް، ތަމްރީނާއި ތަޖުރިބާ ހޯދުމުގެ ފުރުސަތު ޤައުމީ ފެންވަރުގައި ހުޅުވާލުމަށް މި މިނިސްޓްރީން ހިންގާ ޚާއްސަ ޕްރޮގްރާމެކެއެެވެ. މި ޕްރޮގްރާމްގެ ދަށުން އަތޮޅުތެރެއާއި މާލެ ހިމެނޭގޮތަށް ޖުމްލަ 762 ޒުވާނުން މިހާރުވެސް ދަނީ ތަމްރީން ކުރެވެމުންނެވެ.