މެލޭޝިއާގައި ކުރިއަށްދިޔަ އިންޓަރނޭޝަނަލް ސެވަން އަ ސައިޑް ފުޓްބޯޅަ މުބާރާތުގެ ވެޓެރަންސް ކެޓެގަރީގެ ޗެމްޕިއަންކަން ހޯދި މޯލްޑިވްސް ސޮކަރ މޭޓްސް ޓީމު އެނބުރި ރާއްޖެ އައުމުން އެޓީމަށް ހޫނު މަރުޙަބާއެއް ކިޔައިފި އެވެ.

މެލޭޝިއާ ނެގްރީ ސެމްބިލާންގައި ބޭއްވި އައިއާރްސީ އިންޓަރނޭޝަނަލް ސެވަން އަ ސައިޑް ފުޓްބޯޅަ މުބާރާތުގެ ޗެމްޕިއަންކަން ރާއްޖޭގެ އެމްއެސް މޭޓްސްއިން ހޯދީ ފައިނަލުގައި މެލޭޝިޔާގެ ޓީމެއް ބަލިކޮށްގެންނެވެ. މި މުބާރާތުގައި ބޫޓާން، ސިންގަޕޫރު، މެލޭޝިއާ އަދި އިންޑޮނޭޝިއާގެ ވެޓެރަންސް ޓީމުތަކުން ވާދަކުރިއެވެ.

އެމްއެސް މޭޓްސްގެ ޓީމް މާލެއައުމުން އެޓީމަށް މަރުޙަބާ ދެންނެވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ކޮމިޝަނާ އޮފް ސްޕޯޓްސް މުޙައްމަދު ތޮލާލް އެވެ. މީގެ އިތުރުން ކުޅިވަރު ވުޒާރާގެ ދެ ސްޓޭޓް މިނިސްޓަރުންކަމަށްވާ އިބްރާހިމް އާމިރު އާއި އަބްދުއްރައްޒާގް އިބްރާހިމް އާއި މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ނައިބު ރައީސް އަޙުމަދު އިސްމާއިލް އާއި އެމްއޯސީގެ ސެކެޓްރީ ޖެނެރަލް ތަމޫހު އަހުމަދު ސައީދުވެސް ބައިވެރިވެވަޑައިގެންނެވި އެވެ.

ވެލާނާ އިންޓަނޭޝަނަލް އެއާޕޯޓުގެ ވީއައިޕީ ޓާމިނަލް އިން އެމްއެސް މޭޓްސްގެ ކުޅުންތެރިންނަށް މަރުޙަބާ ދެންނެވުމަށްފަހު މިނިސްޓަރ ރާފިޢު ވަނީ އެ ކުޅުންތެރިންގެ މަސައްކަތް ފާހަގަކުރައްވާ ހިތްވަރު ދެއްވާފަ އެވެ. އަދި ފުޓްބޯޅައިގެ ކުރީގެ ކުޅުންތެރިން މި ކުޅިވަރު ކުޅުން ހުއްޓާނުލައި ކުރިއަށްދިޔުމަށް ކުރަމުން އަންނަ މަސައްކަތްވެސް މިނިސްޓަރ ވަނީ ފާހަގަކުރައްވާފަ އެވެ.