މާލޭ ސަރަހައްދުގައި ހުރި ކުޅިވަރު ކުޅޭ ތަންތަނުގެ އާބާތުރަ ފިލުވުމުގެ މަސައްކަތް ފަށައިފި އެވެ. 

ގްރޭޓާ މާލޭ ސަރަހައްދުގައި ކުޅިވަރު ކުޅޭ ގިނަ ތަންތަން ހިމެނޭއިރު، އެތަންތަން މާރާމާތު ނުކުރެވި ގިނަ ދުވަސްވެފައިވާތީ، ބައެއްތަންތަން ހުރީ ބޭނުން ކުރަން ނުރައްކާތެރި ހާލަތުގަ އެވެ. އެހެންކަމުން މިތަންތަން މަރާމާތު ކުރުމުގެ މަސައްކަތް މި ސަރުކާރުން ވަނީ މި އަހަރުގެ ކުރީކޮޅު ފަށާފަ އެވެ.

މި މަސައްކަތުގެ ތެރެއިން ފުރަތަމަ ކުރެވުނު މަސައްކަތަކީ މަރާމާތު ބޭނުންވާ ތަންތަން ފާހަގަކޮށް، އެކަންކުރެވޭނެ އިންތިޒާމް ހަމަޖެއްސުމުގެ މަސައްކަތެވެ. ކަމާ ގުޅުންހުރި އިދާރާތަކާ ގުޅިގެން ކުޅިވަރު ކުޅޭ ތަންތަން މަރާމާތު ކުރުމުގެ އަމަލީ މަސައްކަތްވަނީ ފަށާފަ އެވެ.

މިހާތަނަށް ކުރެވުނު މަސައްކަތްތަކަށް ބަލާއިރު، މާލޭ ފަތާ ޓްރެކްގެ ޕްލެޓްފޯމަށް ލިބިފައިވާ ގެއްލުން ފާހަގަކޮށް އެކަން ވަނީ މަރާމާތުކުރެވިފައ އެވެ. މީގެ އިތުރުން މާލޭ ސަރަހައްދުގެ އައުޓްޑޯ ޖިމްތައްވެސް މަރާމާތުކުރަން ވަނީ ފެށިފަ އެވެ. މިގޮތުން މައްޗަންގޯޅި ބުރުޕާކުގައި ހުރި ޖިމް މަރާމާތުކޮށް، އާބާތުރަ ފިލުވައި މި މަސްތެރޭގައި އަލުން ހުޅުވާލެވޭނެ އެވެ.