މާލެ ސިޓީ ކުޅިވަރު އެކުވެނި ނެޓްބޯޅަ ކޯޓް ރޮސްޓްރަމް ޤާއިމްކުރުމަށާއި ހދ.ކުޑަހުވަދޫގައި އައުޓްޑޯ ވޮލީކޯޓެއް ތަރައްޤީކުރުމަށް ބަޔަކާއި ހަވާލުކޮށްފިއެވެ.

ކުޅިވަރު އެކުވެނީގައި ޒަމާނީ ފެންވަރަށް ތަރައްޤީކޮށްފައިވާ ނެޓްބޯޅަ ކޯޓްގައި ރޮސްޓްރަމް ޤާއިމްކުރުމުގެ މަސައްކަތް ކުރުމަށް ޔޫތު މިނިސްޓްރީން ހަވާލުކޮށްފައިވަނީ ލިޓްލް ނިއު ކޮމްޕެނީ ޕްރައިވެޓް ލިމިޓެޑް އާއެވެ. އަދި ދ.ކުޑަހުވަދޫގައި އައުޓްޑޯ ވޮލީކޯޓެއް ތަރައްޤީކުރުމުގެ މަސައްކަތް ހަވާލުކުރީ މެކްސްޓަރ މޯލްޑިވްސްއާއެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި  ކުރިޔަށްގެންދިޔަ ސޮއިކުރުމުގެ ރަސްމިއްޔާތުގައި މިނިސްޓްރީގެ ފަރާތުން  އެއްބަސްވުމުގައި ސޮއިކުރެއްވީ، ޑެޕިއުޓީ މިނިސްޓަރ އަޙުމަދު މުޙައްމަދު އެވެ. އަދި ލިޓްލް ނިއު ކޮމްޕެނީ ޕްރައިވެޓް ލިމިޓެޑް ފަރާތުން މި އެއްބަސްވުމުގައި ސޮއިކުރެއްވީ، އެ ކުންފުނީގެ ޕްރޮޖެކްޓް މެނޭޖަރ އިބްރާހިމް ހުމެއިދުއެވެ.

ނެޓްބޯޅަ ކޯޓްގައި ޤާއިމްކުރާ ރޮސްޓްރަމްގެ މަސައްކަތުގެ ޖުމްލަ އަގަކީ 4،829،144.53 ރުފިޔާއެވެ. މި މަސައްކަތް ލިޓްލް ނިއު ކޮމްޕެނީ ޕްރައިވެޓް ލިމިޓެޑް އާއި ހަވާލުކޮށްފައިވަނީ މަސައްކަތް ފަށާތާ 150 ދުވަހުގެ ތެރޭގައި މަސައްކަތް ނިންމަން ޖެހޭ ގޮތަށެވެ.

މީގެ އިތުރުން ދ.ކުޑަހުވަދޫ އައުޓްޑޯ ވޮލީކޯޓް ތަރައްޤީކުރުމުގެ މަސައްކަތް މެކްސްޓަރ މޯލްޑިވްސް އާއި ހަވާލުކޮށް އެ މަސައްކަތުގެ އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙުމަދު ފުޢާދުއެވެ. އަދި މެކްސްޓަރ މޯލްޑިވްސް ފަރާތުން މި އެއްބަސްވުމުގައި ސޮއިކުރެއްވީ، މުހައްމަދު އިބްރާހިމްއެވެ.

ދ.ކުޑަހުވަދޫގައި ތަރައްޤީކުރުމަށް ހަމަޖެހިފައިވާ ވޮލީކޯޓްގެ މަސައްކަތުގެ ޖުމްލަ އަގަކީ 1,374,178.01 ރުފިޔާއެވެ. މި މަސައްކަތް މެކްސްޓަރ މޯލްޑިވްސް އާއި ހަވާލުކޮށްފައިވަނީ މަސައްކަތް ފަށާތާ 35 ދުވަހުގެ ތެރޭގައި މަސައްކަތް ނިންމަން ޖެހޭ ގޮތަށެވެ.