ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު، ލ. މާވަށް ކައުންސިލާ ބައްދަލުކުރައްވައި، އެރަށުގެ ކުޅިވަރުގެ ހާލަތާ ގުޅޭގޮތުން މަޝްވަރާކުރައްވައިފި އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާގައި ބޭއްވުނު މި ބައްދަލުވުމުގައި މާވަށު ކައުންސިލްގެ އިސްވެރިންނާއި، ކުޅިވަރު ވުޒާރާގެ އިސްވެރިން ބައިވެރިވެވަޑައިގެންނެވި އެވެ.

މި ބައްދަލުވުމުގައި މާވަށު ކައުންސިލުން ވަނީ އެރަށުގައި މިވަގުތު ހުރި ކުޅިވަރު ވަސީލަތްތަކުގެ ހާލަތާއި، ރަށުގެ ކުޅިވަރުގެ މިހާރުގެ ހާލަތު ހިއްސާކުރައްވާފައެވެ. މީގެ އިތުރުން އެރަށުގެ ރައްޔިތުންގެ މެދުގައި މަގުބޫލު ކުޅިވަރުތަކާއި، އެ ކުޅިވަރުތައް ކުރިއެރުވުމަށް ކުރަމުން އަންނަ މަސައްކަތްތައްވެސް ކައުންސިލުން ހިއްސާކުރެއްވި އެވެ.

ވަޒީރު ރާފިޢު ވަނީ ކައުންސިލުން އެދިފައިވާ ކަންކަން ކޮށްދިނުމުގައި ސަރުކާރުން ފުރިހަމަ އެއްބާރުލުން ދެއްވާނެކަމަށް ވިދާޅުވެ އެ ރަށަށް ބޭނުންވާ ކުޅިވަރު ވަސީލަތްތައް ގާއިމްކުރުމަށް ކުރެވޭނެކަމާ ގުޅޭ ތަފްސީލްތައް ހިއްސާކުރައްވާފަ އެވެ.