ރާއްޖޭގެ ކުޅިވަރު ކުރިއެރުވުމަށް ސްޕޯޓްސް ފަންޑެއްއެކުލަވާލުމުގެ މަސައްކަތް ކުރިއަށްދާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ކުޅިވަރު ވަޒީރު ޢަބްދުﷲ ރާފިޢު މިހެން ވިދާޅުވީ ޕީއެސްއެމްގެ ޕްރޮގްރާމަކަށް ދެއްވި އިންޓަވިއުއެއްގަ އެވެ. މި އިންޓަވިއުގައި މިނިސްޓަރ ވިދާޅުވީ ރާއްޖޭގެ ކުޅިވަރު ކުރިއަރުވަން މިވަގުތު ފަންޑެއްގެ މުހިއްމުކަން ބޮޑު ކަމަށެވެ. މިގޮތުން އެތުލީޓުންގެ ތަމްރީންތައް ހަރުދަނާ ގޮތެއްގައި ކުރިއަށްގެންދިޔުމަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ ފައިސާ ނެތުންކަމަށްވާތީ ސްޕޯޓްސް ފަންޑާއިއެކު މިކަމަށް ހައްލު ލިބިގެން އަންނާނެކަމަށެވެ.

މިހާރުވެސް ކުޅިވަރު ވުޒާރާގެ އެތުލީޓުން ތަމްރީން ސްކޮލާޝިޕް ޕްރޮގްރާމް "އަރުތަ" ކުރިއަށްގެންދެ އެވެ. ނަމަވެސް މި ޕްރޮގްރާމްވެސް މިހާރަށްވުރެ ހަރުދަނާ ވާންޖެހޭކަމަށްވެސް މިނިސްޓަރ ފާހަގަކުރެއްވި އެވެ.

މިނިސްޓަރ ވިދާޅުވީ ފަންޑުން ޚަރަދުކުރާނީ ވީހާވެސް ދެ ފުށްފެންނަ ގޮތަކަށް ކަމަށާއި ކުޅިވަރު ކުރިއެރުވުމުގެ އެކި ކަންކަމަށް ފަންޑު ބޭނުން ކުރެވޭނެ ކަމަށެވެ.