ކޮންމެ މުބާރާތެއްގައިވެސް ވާދަކުރި ނަމަވެސް ކުޅިވަރުގެ ޑިސިޕްލިން ހިފަހައްޓައި، ކާމިޔާބީއަށް މަސައްކަތްކުރަން އާދަކުރަން ޖެހޭކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ނޭޕާލްގައި މިމަހުގެ 18ގައި ފަށާ 20 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރަން ގައުމީ ޖޫނިއާ ޓީމް އަންނަނީ ތައްޔާރުވަމުންނެވެ. ކުޅިވަރު ވަޒީރު ރާފިޢު ވަނީ ކުޅުންތެރިންނާ ބައްދަލުކުރައްވާ ހިތްވަރު ދެއްވާފަ އެވެ.

ވަޒީރު ރާފިޢު ވިދާޅުވީ މުބާރާތަށް ދާން ޖެހޭނީ ބައިވެރިވެލުމުގެ މަގުސަދުގައި ނޫން ކަމަށާއި ކާމިޔާބު ކުރުމުގެ އަމާޒުގައި ކަމަށެވެ. އޭނާ ވިދާޅުވީ ކޮންމެ މުބާރާތެއްގައިވެސް ވާދަކުރި ނަމަވެސް ކުޅިވަރުގެ ޑިސިޕްލިން ހިފަހައްޓައި، ކާމިޔާބީއަށް މަސައްކަތްކުރަން އާދަކުރަން ޖެހޭކަމަށެވެ.

"ވަރަށް މުހިންމުކަމެއް އެތުލީޓެއްގެ ކިބައިގައި ހުންނަންޖެހޭ ސިފަތައް ހުރުން. އޭގެ މާނައަކީ ބަރާބަރަށް ނަމާދު ކުރުން. ބަރާބަރަށް ކެއުން. ބަރާބަރަށް ހައިޑްރޭޝަން މެއިންޓެއިން ކުރުން. އިންސްޓްރަކްޝަން ދޭ ގޮތަށް އަމަލުކުރުން،" ރާފިއު ވިދާޅުވި އެވެ.