ރާއްޖޭގެ ކުޅިވަރު ކުރިއެރުވުމަށް ތައްޔާރުކުރާ ދުރުރާސްތާ ޕްލޭނުގެ ސަބަބުން ދިވެހި ކުޅިވަރަށް ދެމެހެއްޓެނިވި ކުރިއެރުން އަންނާނެކަމަށް ގަބޫލުކުރައްވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

މޮޅެތި އެތުލީޓުން ބިނާކުރުމުގެ ދިގު ރާސްތާ ޕްލޭން އަކީ މި ސަރުކާރުގެ ހަފްތާ 14ގައިވެސް ހިމެނުނު މުހިންމު މަސައްކަތެކެވެ. މި މަސައްކަތުގެ ތެރެއިން ދިގު ރާސްތާ ޕްލޭންގެ ފުރަތަމަ ޑްރާފްޓް ވަނީ މިދިޔަ ފެބްރުއަރީ މަހު އެކުލަވާލާފަ އެވެ.

އޭގެ ނުވަ މަސް ފަހުން ތަފްސީލީ ޑްރާފްޓެއް މިހާރު ވަނީ ތައްޔާރުކޮށްފަ އެވެ. އެމެރިކާގެ ދެ ތަޖުރިބާކާރުންގެ އެހީތެރިކަމާއިއެކު ތައްޔާރުކުރާ ކުޅިވަރުގެ ދިގު ރާސްތާ ޕްލޭންގައި ރާއްޖެ ތިން ސަރަހައްދަކަށް ބަހާލައިގެން ކުޅިވަރު ކުރިއަރުވަން ވަނީ ހުށަހަޅާފަ އެވެ. މިގޮތުން މި ސަރަހައްދުތަކުގައި އެކި މަރުހަލާތަކަށް ބަހާލައިގެން އެތުލީޓުން ތަމްރީންކުރުން ހިމެނެ އެވެ.

މި ޕްލޭނުގެ އެންމެ ބޮޑު އަމާޒަކީ 2030 އަދި 2034 ވަނަ އަހަރުގެ އޭޝިއަން ގޭމްސްގެ ޕޯޑިއަމް ފިނިޝިން ނުވަތަ މެޑެއްޔެއް ހޯދުމެވެ. އަދި 2036 ވަނަ އަހަރާއި 2040 ވަނަ އަހަރުގެ އޮލިމްޕިކްސްއިން ދިވެހި އެތުލީޓުން މެޑެލް ހޯދުމެވެ.

ކުޅިވަރު ކުރިއެރުވުމުގެ ދުރު ރާސްތާ ޕްލޭންއާ ގުޅޭގޮތުން ކުޅިވަރު ވަޒީރު ޢަބްދުﷲ ރާފިޢު ވިދާޅުވީ މި ޕްލޭނާއިއެކު ދިވެހި ކުޅިވަރަށް ދެމެހެއްޓެނިވި ކުރިއެރުމެއް އަންނާނެކަމަށެވެ. މިއީ މިވަގުތު ދިވެހި ކުޅިވަރު ދެން އޮތް ހަރުފަތަށް ދިޔުމަށް އެންމެ ބޮޑަށް ބޭނުންޖެހިފައިވާ އެއް ކަންތައްކަމަށް ވަޒީރު ވިދާޅުވި އެވެ.