8 ވަނަ އިންޓަ އޮފީސް/ކޮމްޕެނީ ހޭންޑްބޯޅަ މުބާރާތް، ކޮމިޝަނަރ އޮފް ސްޕޯޓްސް މުޙައްމަދު ތޮލާލް ފައްޓަވައިދެއްވައިފި އެވެ.

ހޭންޑްބޯޅަ މޯލްޑިވްސް އިން އިންތިޒާމްކޮށްގެން ކުރިއަށްގެންދާ އެންމެ ބޮޑު އެއް މުބާރާތްކަމަށްވާ އިންޓަ އޮފީސް/ކޮމްޕެނީ ހޭންޑްބޯޅަ މުބާރާތު ފެށުމަށް ހޭންޑްބޯޅަ ކޯޓުގައި ވަނީ ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތުގައި މުބާރާތުގެ ޓްރޮފީ ދައްކާލައި މި މުބާރާތް ރަސްމީކޮށް ފައްޓަވައިދެއްވީ ކޮމިޝަނަރ އޮފް ސްޕޯޓްސް މުޙައްމަދު ތޮލާލް އެވެ.

މިއަހަރުގެ މުބާރާތުގައި ޖުމްލަ 42 ޓީމު ބައިވެރިވެފައިވާއިރު، މުބާރާތް ކުރިއަށްދާނީ ދެޑިވިޝަނަކަށް ބަހާލައިގެންނެވެ. އެގޮތުން ފުރަތަމަ ޑިވިޝަނުގައި ފިރިހެން ހަތަރު ޓީމު އަދި އަންހެން ހަ ޓީމު ބައިވެރިވެފައިވާއުރި، މިޑިވިޝަނުގެ އަންހެން އަދި ފިރިހެން މެޗުތައް ވެސް ކުޅުމަށް ހަމަޖެހިފައިވަނީ ލީގު އުސޫލުންނެވެ.

މީގެ އިތުރުން މުބާރާތުގެ ދެވަނަ ޑިވިޝަނުގައި އަންހެން 20 ޓީމުގެ އަދި ފިރިހެން 12 ޓީމެއް ވަނީ ބައިވެރިވެފައެވެ.