ކ.ގުރައިދޫގައި ތަރައްޤީކޮށްފައިވާ ޓާފް ފުޓްބޯޅަ ދަނޑު ރައީސުލްޖުމްހޫރިއްޔާގެ ނައިބު ފައިސަލް ނަސީމް ހުޅުއްވައިދެއްވައިފިއެވެ.

މި ސަރުކާރުން ގުރައިދޫގައި ތަރައްޤީކުރި މި ދަނޑު ހުޅުވީ އެކަމަށްޓަކައި އާދީއްތަ ދުވަހު ހަވީރު ގުރައިދޫ ޓާފް ދަނޑުގައި ބޭއްވި ހާއްސަ ރަސްމީޔާތެއްގައެވެ. މި ރަސްމީޔާތުގައި ނައިބު ރައީސް ފައިސަލް ނަސީމްގެ އިތުރުން މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނީ އެމްޕަވަރމަންޓް އަޙުމަދު މަހުލޫފްވެސް ބައިވެރިވެވަޑައިގެންފައެވެ. އަދި މީގެ އިތުރުން ކ.ގުރައިދޫ ކައުންސިލްގެ އިސްވެރިންގެ އިތުރުން ރަށުގެ ގިނަ އަދަދެއްގެ އާއްމު ރައްޔިތުންވެސް ވަނީ ދަނޑު ހުޅުވުމުގެ ރަސްމީޔާތުގައި ބައިވެރިވެފައެވެ.

މި ދަނޑު ހުޅުވުމުގެ ގޮތުން އިއްޔެ ހަވީރު ވަނީ ހާއްސަ ފުޓްބޯޅަ މެޗެއްވެސް ކުޅެފައެވެ. އެގޮތުން މި މެޗުގައި ބައްދަލުކުރީ ރާއްޖޭގެ މަޝްހޫރު ފުޓުބޯޅަ ކުޅުންތެރިން ހިމެނޭ ޔޫތު މިނިސްޓްރީގެ ޓީމެއްގެ އިތުރުން ގުރައިދޫ އިން ހޮވާލި ޓީމެކެވެ. މެޗުގައި ނައިބު ރައީސް ފައިސަލް ނަސީމްގެ އިތުުރުން ޔޫތް މިނިސްޓަރ އަޙުމަދު މަހުލޫފް ވަނީ މިނިސްޓްރީގެ ޓީމަށް ކުޅުއްވާފައެވެ.

ކ.ގުރައިދޫގައި ތަރައްޤީކޮށްފައިވާ ޓާފް ފުޓްބޯޅަ ދަނޑުގެ ސަބްބޭސް މަސައްކަތް ކުރިޔަށް ގެންގޮސްފައިވަނީ، އާރު.ކޭ.އެލް ގްރޫޕް ޕްރައިވެޓް ލިމިޓެޑުންނެވެ. އަދި ޓާރފް އެޅުމުގެ މަސައްކަތް ވީ.އޭ.އެމް ކޮމްޕެނީ ޕްރައިވެޓް ލިމިޓެޑުން ކޮށްފައިވާއިރު، ވަށާފާރު އަދި ފެންސްގެ މަސައްކަތް ކޮށްފައިވަނީ އަލް އަމީން އިންވެސްޓްމަންޓްގެ ފަރާތުންނެވެ. މި ދަނޑު ތަރައްޤީ ކުރުމަށް ޖުމްލަ 6،030،298.41 ރުފިޔާ ވަނީ ޚަރަދުކޮށްފައެވެ.

ދަނޑު ހުޅުވުމުގެ ރަސްމީޔާތުގައި ވާހަކަ ދައްކަވަމުން ޔޫތް މިނިސްޓަރ އަޙުމަދު މަހްލޫފް ވިދާޅުވީ، މިހާރު ރާއްޖޭގެ އެކި ކަންކޮޅުތަކުގައި 40 އަށްވުރެއް ގިނަ ދަނޑުގެ މަސައްކަތް ނިންމާލެވިފައިވާކަމަށެވެ. އަދި ކުޑަ ލަސްކަމަކާއެކުވެސް ގުރައިދޫ ދަނޑުގެ މަސައްކަތް ނިންމާލެވުނީތީ އުފާފުޅުކުރައްވާކަމަށް މަހްލޫފް ވިދާޅުވިއެވެ.

ރާއްޖޭގެ ރަށްރަށުގައި ފެންވަރު ރަނގަޅު ފުޓުބޯޅަ ދަނޑުތައް އެޅުމަކީ ރައީސުލްޖުމްހޫރިޔާ އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ. އަދި އެ ވައުދާ އެއްގޮތަށް މިހާރުވެސް ރާއްޖޭގެ އެކި ކަންކޮޅުތަކުގައި ގިނަ ދަނޑުތަކެއްގެ މަސައްކަތް ދަނީ ކުރަމުންނެވެ.