ޚާއްސަ އެހީއަށް ބޭނުންވާ ފަރާތްތަކަށް ބޭނުންކުރެވޭ ގޮތަށް ފަރުމާ ކޮށްފައިވާ ވެހިކަލް ތަކެއް ޖަޕާން ސަރުކާރުގެ ފަރާތުން މޯލްޑިވްސް އެސޯސިއޭޝަން ފޯރ ޕާސަންސް ވިތް ފިޒިކަލް ޑިސްއެބިލިޓީޒް (އެމްއޭޕީޑީ) އަށް ހަދިޔާކޮށްފިއެވެ.

މި ވެހިކަލްތައް އެމްއޭޕީޑީ އަށް ހަވާލުވުކުރުމުގެ ގޮތުން ހުޅުމާލޭ އެއް ނަންބަރު ރުއްގަނޑު ސަރަހައްދުގައި ވަނީ ރަސްމިއްޔާތެއް ބާއްވާފައެވެ.

މި ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަހްމަދު މަހްލޫފްއެވެ. މީގެ އިތުރުން ދިވެހިރާއްޖޭގައި ހުންނަވާ ޖަޕާނުގެ ސަފީރު މިދޮރި ތަކެއުޗި އާއި އެމްއޭޕީޑީގެ އިސްވެރިންނާއި ބައެއް މެމްބަރުން އަދި ހައުސިން ޑެވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރު ސުހައިލް އަހުމަދު ބައިވެރިވަޑައިގެންނެވިއެވެ.

ޖަޕާން ސަރުކާރުން ހަދިޔާކުރި 3 ވެހިކަލް ފަރުމާކޮށްފައިވަނީ ވީލްޗެއާރގައި އުޅޭ މީހުންނަށް ފަސޭހައިން އެރޭ ގޮތަށެއެވެ. މި ގޮތުން ރިމޯޓެއް ބޭނުންކޮށްގެން އޮޕަރޭޓްކުރެވޭ ހާއްސަ ރޭމްޕެއް މި އުޅަނދުތަކުގައި ހުރެއެވެ.