އިސްރަށްވެހިންގެ ދުޅަހެޔޮކަން އިތުރުކުރުމަށް އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާ އާއި ކުޅިވަރާއި ހަށިހެޔޮކަމަ ބެހޭ ވުޒާރާއިން މަޝްވަރާކޮށްފި އެވެ. 

ކުޅިވަރާއި ހަށިހެޔޮކަމާ ބެހޭ ވުޒާރާގައި ކުރިއަށްދިޔަ މި ބައްދަލުވުމުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި އިޖްތިމާޢީ އަދި އާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ބައިވެރިވެވަޑައިގެންނެވި އެވެ. 

ރާއްޖޭގެ އިސްރަށްވެހިންގެ ދުޅަހެޔޮކަން އިތުރުކުރުމާ ގުޅޭގޮތުން ކުރިއަށްދިޔަ މި ބައްދަލުވުމުގައި އިސްރަށްވެހިންގެ ޖިސްމާނީ، ނަފްސާނީ އަދި އިޖްތިމާއީ ދުޅަހެޔޮކަން ކަށަވަރުކުރުމުގެ މުހިންމުކަމާ ގުޅޭގޮތުން މަޝްވަރާކުރެވުނެވެ. މީގެ އިތުރުން ކަސްރަތާއި އިޖްތިމާޢީ ހަރަކާތްތަކުގެ ތެރެއިން މުޖުތަމަޢުގެ ގުޅުން ބަދަހިކުރުމަށް މަސައްކަތްކުރެވޭނެ ގޮތްތަކާ ގުޅޭގޮތުންވެސް ވަނީ ވާހަކަދެކެވިފަ އެވެ.

އަދި  ރަށްރަށުގެ ވަސީލަތްތައް އެންމެންނަށް ފަސޭހައިން ބޭނުންކުރެވޭނެކަން ކަށަވަރުކުރުމުގެ މުހިންމުކަމާއި، މިކަން ކުރެވޭނެ ގޮތްތަކާ ގުޅޭގޮތުންވެސް ވަނީ މަޝްވަރާކުރެވިފަ އެވެ. 

ދެ ވުޒާރާއިން ވަނީ  އެއް އަމާޒަކަށް މަސައްކަތްކުރާއިރު، ގުޅިގެން މަސައްކަތްކުރުމުގެ މުހިންމުކަން ފާހަގަކޮށްފަ އެވެ.