އައިޓީއެފް އޭޝިއާ 14 އަހަރުން ދަށުގެ ޑިވެލޮޕްމަންޓް ޗެމްޕިއަންޝިޕުގެ ރީޖަނަލް ކޮލިފައިން އިވެންޓުން ތާރީޚީ ކާމިޔާބީތައް ހޯދި ގައުމީ ޓެނިސް ޓީމާ، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރްޔަމް މާރިޔާ ބައްދަލުކުރައްވައިފި އެވެ. 

ސްޕޯޓްސް މިނިސްޓްރީގައި ކުރިއަށްދިޔަ މި ބައްދަލުކުރެއްވުމުގައި ހަޔަރ އެޑިޔުކޭޝަން މިނިސްޓަރު ޑރ. މާރިޔާގެ އިތުރުން ސްޕޯޓްސް މިނިސްޓްރީގެ ދެ ޑެޕިއުޓީ މިނިސްޓަރުންކަމަށްވާ ފާތިމަތު ފަޒުލާ ރަޝީދު އާއި މުޙައްމަދު މުންތިފް އަޙުމަދު ބައިވެރިވެވަޑައިގެންނެވި އެވެ. 

މި ބައްދަލުވުމުގައި ޓީމްގައި ހިމެނޭ ޒުވާން ކުޅުންތެރިންގެ ކިޔެވުމުގެ ކަންކަން ކުރިއަށްދާ ގޮތާއި، ޕްރެކްޓިސްތަކުގެ މައުލޫމާތުތައް މިނިސްޓަރު މާރިޔާ އޮޅުންފިލުވި އެވެ. އަދި ކުޅިވަރު ކުޅުމާއި، ކިޔެވުމުގައި ދިވާމާ ގޮންޖެހުންތަކުގެ މައުލޫމާތު ހޯއްދަވައި އެކަންކަން ހައްލުކުރެވޭނެ ގޮތްތައްވެސް މަޝްވަރާކުރެއްވި އެވެ. މީގެ އިތުރުން ކުޅުންތެރިންގެ އެހެނިހެން ހުނަރުތަކާއި، އެ ހުނަރުތައް  ތަރައްގީކުރުމަށް ކުރެވޭނެކަންކަންވެސް އޮޅުންފިލުވި އެވެ. 

ޓެނިސް އެސޯސިއޭޝަންގެ އިސްވެރިންވެސް މި ބައްދަލުވުމުގައި ބައިވެރިވިއިރު، ޒުވާން ޓީމަށް މިއަހަރު ކުރިއަށްހުރި މުބާރާތްތަކުގެ މައުލޫމާތު، އެ އެސޯސިއޭޝަނުންވަނީ މިނިސްޓަރާ ހިއްސާކުރައްވާފަ އެވެ. 

14 އަހަރުން ދަށުގެ ޓެނިސް ޓީމްގައި ހިމެނޭ އަންހެން ދެ ކުޅުންތެރިންނަކީ ނަބާ ނިޝާން އާއި މަންހާ މުޙައްމަދު އެވެ. އަދި ފިރިހެން ދެ ކުޅުންތެރިންނަކީ މީކާ މުޙައްމަދު ކަލީމް އަދި އާދަމް އާލް ނިޔާޒު އެވެ.