ހަށިހެޔޮ މުޖުތަމަޢެއް ބިނާކުުރުމުގެ މަޤްޞަދުގައި ކުރިއަށްގެންދާ "ހަށިހެޔޮ ރާއްޖެ" ޕްރޮގްރާމުގެ ލީޑަރުން ތަމްރީންކުރުމުގެ ދެވަނަ ފިޔަވަހި ނިންމާލައިފި އެވެ.

"ހަށިހެޔޮ ރާއްޖެ" ޕްރޮގްރަމްގެ ތެރެއިން ރާއްޖޭގެ އަތޮޅުތައް 6 ޒޯން އަކަށް ބަހާލައިގެން ލީޑަރުން ތަމްރީންކުރުމުގެ މަސައްކަތް ކުރިއަށްދާނެ އެވެ. މިގޮތުން ޒޯން 1ގައި ހިމެނޭ ހއ، ހދ އަދި ށ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލަރުންނާއި ޔޫތު އެސޯސިއޭޓުން ތަމްރީން ކުރުމުގެ ޕްރޮގްރާމް ވަނީ މިމަހުގެ ކުރީކޮޅު ކުރިއަށްގެންގޮސްފަ އެވެ.

މާލޭގައި އިއްޔެ ނިމުނީ މި ސަރަހައްދުގެ އަތޮޅުތައް ކަމަށްވާ ކ. ވ. އއ. އަދި އދގެ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލަރުންނާއި ޔޫތު އެސޯސިއޭޓުން ތަމްރީންކުރުމުގެ ޕްރޮގްރާމެވެ. މި ޕްރޮގްރާމްގައި ސްޕޯޓްސް ކައުންސިލަރުންނާއި، ޔޫތު އެސޯސިއޭޓުންގެ ޒިންމާތަކާއި އެމީހުންގެ ރޯލަކީ ކޮބައިކަމާއި ކުޅިވަރާ ބެހޭ ވުޒާރާގެ މެންޑޭޓުގައިވާ ކަންތައްތަކަކީ ކޮބައިކަން ހިއްސާކޮށް ވަނީ އަހުލުވެރިކުރުވާފަ އެވެ.

މިތަމްރީންތަކުގެ ތެރެއިން ތިއަރީ ކްލާސްތަކާއި، ފިޒިކަލް އެކްޓިވިޓީތަކުގެ އިތުރުން ލީޑާޝިޕް ތަމްރީންތަކާއި، މެނޭޖްމަންޓް އަދި މަގާމާ ގުޅުންހުރި އެހެން ދާއިރާތަކުގެ ތަމްރީންތައްވެސް ވަނީ ދެވިފަ އެވެ.

"ހަށިހެޔޮ ރާއްޖެ" ޕްރޮގްރަމްގެ މައިގަނޑު މަޤްޞަދަކީ ރަށްރަށުގައި އެކި އުމުރު ފުރައިގެ މީހުންނަށް ފިޓްނަސް ޕްރޮގްރާމްތަށް ކުރިއަށް ގެންދާއިރު ތަފާތު ހަރަކާތްތައް ގެންދާނެ އެންމެ ރަނގަޅު ގޮތްތައް އަންގައިދިނުމަށް ހަމަޖެހިފައިވެއެވެ. އަދި މުޖުތަމަޢު ތަމްރީން ޕްރޮގްރާމްތަކާއި ހަރަކާތްތައް ކުރިއަށް ގެންދިއުމުގައި އެރަށަކަށް އެންމެ އެކަށޭނެ ޕްރޮގްރާމަކީ ކޮބައިތޯ އާއި އިވެންޓުތައް މެނޭޖް ކުރާނެ ގޮތްތައް އަންގައިދީ، މަޤްބޫލު އިވެންޓެއްގެ ގޮތުގައި ގެންދާނެ ގޮތްތައް ދަސްކޮށްދިނުމެވެ.