ރާއްޖޭގެ ހުރިހާ ރަށެއްގައި ތިބި ސްޕޯޓްސް ކައުންސިލަރުންނާއި، ކުޅިވަރު ވުޒާރާގެ ސިޔާސީ މުވައްޒަފުންނަށް އަމާޒުކޮށް ކުރިއަށްގެންދިޔަ "ހަށިހެޔޮ ރާއްޖެ" ލީޑަރުން ތަމްރީން ކުރުމުގެ ޕްރޮގްރާމް ނިމުމުގެ ގޮތުން ކުރިއަށްގެންދިޔަ ފަހި ހަވީރުގައި ވަޒީރު ރާފިޢު ބައިވެރިވެވަޑައިގަންނަވައިފި އެވެ. 

ގދ. ތިނަދޫ ސިޓީގައި ސްޓޭޑިއަމްގައި ކުރިއަށްދިޔަ މި ހަވީރުގައި ހުރިހާ އުމުރުފުރާއެއްގެ މީހުންނަށް އަމާޒުކޮށް ހަރަކާތްތައް ކުރިއަށްގެންދިޔަ އެވެ. މި ގޮތުން ކުޑަކުދިންނަށް ހާއްސަ ހަރަކާތްތަކާއި، މެދު އުމުރުގެ ކުދިންނާއި، ޒުވާނުންގެ އިތުރުން އުމުރުން ދުވަސްވީ މީހުންނަށްވެސް އަމާޒުކޮށް ހަރަކާތްތަކެއް ކުރިއަށްދިޔަ އެވެ. 

މި ހަރަކާތްތަކުގައި ތިނަދޫ ސިޓީގެ ގިނަ އަދަދެއްގެ ބަޔަކު ބައިވެރިވި އެވެ. 

"ހަށިހެޔޮ ރާއްޖެ" ލީޑަރުން ތަމްރީން ކުރުމުގެ ޕްރޮގްރާމް ނިމުމުގެ ގޮތުން ކުރިއަށްގެންދިޔަ ފަހި ހަވީރުގައި ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު އާއި ހެލްތު މިނިސްޓަރ އަބްދުﷲ ނާޒިމް އިބްރާހިމްވެސް ބައިވެރިވެވަޑައިގެންނެވި އެވެ. މިގޮތުން އެ ބޭފުޅުންނަށް ހާއްސަކޮށް ކުރިއަށްދިޔަ ބައެއް ހަރަކާތްތަކުގައިވެސް ދެ ވަޒީރުން ބައިވެރިވެވަޑައިގެންނެވި އެވެ.