މިއަހަރު ހއ.މުރައިދޫ ފުޓްބޯޅަ ދަނޑު މަސައްކަތް ވީހާވެސް އަވަހަށް ފަށައިދީ، ފުޓްސަލް ދަނޑާއި ވޮލީކޯޓުގެ މަސައްކަތްވެސް މި އަހަރު ނިންމަވައިދެއްވާނެކަމަަށް ރައީސުލްޖުމްހޫރިއްޔާ މުޙައްމަދު މުޢިއްޒު ވިދާޅުވެއްޖެ އެވެ. 

ހއ. މުރައިދޫގެ ކުޅިވަރުގެ ހާލަތު ރަނގަޅުކޮށް، ކުޅިވަރު ވަސީލަތްތައް ޤާއިމްކުރުމާ ގުޅޭގޮތުން ވާހަކަފުޅު ދައްކަވާފައި މިވަނީ ހއ. އަތޮޅަށް ކުރައްވާ ދަތުރުފުޅުގެ ތެރެއިން މުރައިދޫގެ ރައްޔިތުންނާ  ބައްދަލުކުރައްވާ ވާހަކަދައްކަވަމުންނެވެ. 

ރައީސް ވިދާޅުވީ މުރައިދޫގައި މިވަގުތު ތަރައްޤީކުރަމުން އަންނަ ފުޓްބޯޅަ ދަނޑު ވީހާވެސް އަވަހަށް ނިންމުމަކީ ސަރުކާރުގެ ބޮޑު އަމާޒެއްކަމަށެވެ. މިގޮތުން މި އަހަރުގެ ތެރޭގައި އެ މަސައްކަތް ނިންމުމަށް މަސައްކަތްކުރައްވާނެކަމަށް ވިދާޅުވި އެވެ. 

ރައީސް ޑރ. މުޙައްމަދު މުޢިއްޒު ވިދާޅުވީ ފުޓްބޯޅަ ދަނޑުގެ މަސައްކަތް ނިމުމާއިއެކު ފުޓްސަލް ދަނޑުގެ އަޅައިދިނުމާއި، ވޮލީކޯޓެއް އެޅުމުގެ މަސައްކަތްވެސް މި ދައުރުގެ ތެރޭގައި ފައްޓަވައިދެއްވާނެކަމަށެވެ.