ހއ. މާރަންދޫ ފުޓްބޯޅަ ދަނޑުގެ ލައިޓް ޖެހުމާއި ރޮސްޓްރަމްގެ މަސައްކަތް މި އަހަރު ފެށޭނެ: ރައީސް މުޢިއްޒު

29 ޖެނުއަރީ 2025

ހއ. މާރަންދޫ ފުޓްބޯޅަ ދަނޑުގެ ލައިޓް ޖެހުމާއި ރޮސްޓްރަމްގެ މަސައްކަތް މި އަހަރު ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. 
ރައީސުލްޖުމްހޫރިއްޔާ މިހެން ވިދާޅުވީ ހއ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ހއ. މާރަންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ. 
ކުޅިވަރުގެ ދާއިރާއިން އެ ރަށުގައި ޤާއިމްކުރުމަށް ހަމަޖެހިފައިވާ ވަސީލަތްތަކާ ގުޅޭގޮތުން ވާހަކަަދައްކަވަމުން ރައީސުލްޖުމްހޫރިއްޔާ ވިދާޅުވީ، ރިޔާސީ އިންތިހާބުގެ ކެމްޕެއިންގެ ތެރެއިން އެ ރަށުގެ ޒުވާނުން ވަނީ ފުޓްބޯޅަ ދަނޑުގެ ލައިޓް ހަރުކުރުމާއި ރޮޮސްޓްރޮމް ހެދުމަށް އެދިފައިކަމަށެވެ. އެކަމަށް ކެމްޕެއިންގައި ވަޢުދުވެވަޑައިގެންނެވިކަމަށާއި، ލައިޓް ހަރުކުރުމާއި ރޮސްޓްރަމް ހެދުމުގެ އަަމަލީ މަސައްކަތް ވީހާވެސް އަވަހަށް ފެށުމަށް ހަމަޖެހިފައިވާކަމަށެވެ. 
ރައީސް ވިދާޅުވީ ހއ. މާރަންދޫ ފުޓްބޯޅަ ދަނޑުގެ ލައިޓް ޖެހުމާއި، ރޮސްޓްރަމް ހެދުމުގެ އިތުރުން، އެ ރަށުގެ ފުޓްސަލް ދަނޑު މިހާރު އޮތީ ވަރަށް ބޮޑަށް ވީރާނާވެފައިކަމަށާއި، މުޅިން އާ ފުޓްސަލް ދަނޑެއް އެރަށުގައި އަޅުއްވައިދެއްވާނެކަމަށެވެ.
ހއ. މާރަންދޫގައި މިވަގުތު ހުރި ކުޅިވަރު ވަސީލަތްތައް އިތުރުކޮށްދިނުމަށް ކުޅިވަރު ވުޒާރާގެ ތެރެއިން މަސައްކަތްކޮށްދެއްވާނެކަމަށްވެސް ރައީސް ވިދާޅުވި އެވެ.